U hap sot paradite, në Bazilikën e Shën Marisë së Engjëjve, solemniteti i Ndjesës
së Asizit.
(01.08.2008 RV)“Dua t’i çoj të gjithë në Parajsë”: me këto fjalë, plot gëzim,
Françesku i Asizit i komunikonte, më 2 gusht 1216, të gjithë atyre që kishin rendur
për ta dëgjuar në Porciunkola, se Papa Onori III kishte pranuar t’u jepej ndjesa
e plotë të gjithë atyre që do ta kërkonin. E kjo traditë, e ruajtur deri në ditët
tona, përtrihet sërisht sot e nesër në bazilikën e Shën Marisë së Engjëjve në Asizi
dhe në të gjitha kishat françeskane. Ndjesa e Asizit 2008 nisi sot me kremtimin
solemn eukaristik të natës së festës, udhëhequr nga Eprori i përgjithshëm i Urdhërit
të Fretërve të vegjël, Atë Josè Rodriguez Carballo, Legat papnor për Bazilikën e Shën
Marisë së Engjëjve, për të vijuar me veprimtari të tjera, si shtegtimi i dioqezit
të Asizit, kremtimi i lutjeve të mbrëmjes dhe oferta e kemit. Kujtojmë se nga
mesdita e sotme, 1 gusht, deri në mesnatën e nesërme, mund të fitohet ndjesa e plotë
e Porciunkolës. Festa e merr emrin nga kishëza, që ndodhet në Asizi të Italisë, ku
Shën Françesku më 1216 iu lut Zotit t'ua falë të gjitha fajet e mëkatet besimtarëve
që do ta vizitonin këtë kishëz më 1 e 2 gusht, të penduar e të rrëfyer. Për ta
fituar këtë ndjesë, mund të vizitohet Kisha françeskane më e afërt, ose kisha e caktuar
për këtë kremtim, që i siguron besimtarit të penduar fillimin e një jete të re, jetës
së Zotit tonë Jezu Krishtit në jetën tonë. Kanë kaluar qindra vjet, që nga koha kur
Ndjesa e Porciunkolës u kremtua për herë të parë, por festa vijon të jetohet me pëshpirtëri
të thellë, sepse vlera e mëshirës hyjnore është e amshuar.