(29.07.2008 RV)Dita e parë e plotë
në Bresanone për Benediktin XVI, që arriti dje në qytetin altoatezin për një periudhë
pushimesh prej dy javësh. Prania e Atit të Shenjtë, që e njeh mirë dhe e vlerëson
lart këtë qytet, ka krijuar një atmoferë të vërtetë festive. Kjo atmosferë feste e
gëzimi u shpreh sot pasdite nga imzot Vilhelm Emil Eger, gjatë një takimi me gazetarët.
Ndërsa mbrëmë, në Seminarin e Bresanones, arriti edhe vëllai i Papës, imzot Georg
Racinger. Kështu pushimet e Atit të Shenjtë marrin një ngjyrim thellësisht familjar,
siç nënvizon edhe i dërguari i gazetës italiane ‘Avvenire’, Salvatore Maca:
Përgjigje:
- Që para se të arrinte, Papa tha: “Ky për mua është qytet plot me kujtime”,
sepse ka qenë këtu shumë herë për të pushuar, së bashku me të vëllain, Georg e me
motrën, Mari; më pas, si i vdiq e motra, është rikthyer këtu, gjithnjë me të vëllain,
Georg, që arriti mbrëmë, menjëherë pas Papës. Prej këndej mund të themi se pushimet
po marrin përmasën thellësisht familjare, si në kuptimin e takimit të Papës me vëllain,
ashtu edhe me banorët e vendit. Këtu Papën Racinger e njohin shumë njerëz, të cilët
e kanë takuar disa herë në të kaluarën… e prandaj ndjehet fort atmosfera e familjaritetit
dhe e intimitetit. E kjo është diçka vërtetë e bukur.
Pyetje:
- Qyteti i Bresanones, natyrisht, respekton dëshirën e Papës për të pushuar,
por ndërkaq pret edhe ekskursionet e Atit të Shenjtë, për ta takuar, e pret edhe veprimtaritë
e tij publike…
Përgjigje: - Është e
vërtetë! Kam parë shumë njerëz, si vendas, ashtu edh turistë, duke u interesuar për
lutjen e Engjëllit të Tënzot. Prandaj mund të them se njerëzit përgatiten për këtë
takim të parë. Pastaj, natyrisht, ka edhe të papritura: njerëzit presin që Papa të
dalë për të vizituar vendet e shumta, ku ka qenë gjithnjë gjatë pushimeve të mëparshme.
Nuk janë të sigurtë, por urojnë që ta takojnë. Të shohim ç’do të ndodhë nesër e
më pas akoma.
Pyetje: - Kujtojmë se
vitet e kaluara, në Lorencago e në Lë Kombë, Papa nuk i është shmangur kurrë takimeve
me njerëz të ndryshëm…
Përgjigje: -
Jo, në asnjë mënyrë. Madje vitin e kaluar dilte çdo ditë, për të shkuar në të gjitha
vendet kushtuar Zojës së Bekuar rreth Lorencagos, ku ndalohej mbrëmjeve për të thënë
Rruzaren. Këtu ka më shumë mundësi të dalë për të shëtitur, sepse Seminari, ku banon,
është në qendër të vendit. Kështu të gjithë kanë arsye të shpresojnë në një takim
të mundshëm me Atin e Shenjtë.