Për kujtim të Atë Pjetër Meshkallës, jezuit shqiptar, në 20 vjetorin e vdekjes.
(28.07.2008 RV)Atë Pjetër Meshkalla
është një nga njerëzit e Kishës, që meriton të kujtohet jo dy herë në vit, kur lindi
e kur vdiq, por çdo ditë, sepse i prin njeriut në rrugën e humanizmit e të shenjtërisë.
Si Nënë Tereza, Ai ishte shembull i dashurisë në veprim. Në 20-vjetorin e vdekjes,
po e kujtojmë me librin e fundit kushtuar figurës së tij madhore, me vlerësimin që
i është bërë nga disa personalitete dhe me një cikël poetik, shkruar kryesisht për
të dënuar “ujqit e veshun me lëkurë kingji’. Libri i ri, që i kushtohet,
na kujton se njerëz si Ai nuk vdesin kurrë. Mjafton të lidhim në një frazë njëri pas
tjetrit gjashtë titujt, që i paraprijnë gjashtë pjesëve të tij, për të pasur parasysh
figurën e jezuitit shqiptar: “Ai ishte; Ai jetoi; Ai shkroi; Ai nuk përkulej; Ai nuk
thehej; Ai fitoi! Libri është ‘botim i dytë, i përpunuem’, i veprës me të njëjtin
titull, shkuar nga Fritz Radovani – De Angeliis, botuar nga Misioni Katolik në Kroaci. Por,
të kthehemi 20 vjet mbrapa e të ndalohemi tek faqet e librit, që përshkruajnë salikimet
e Patër Meshkallës:
“Më datën 28 korrik 1988, populli i Shkodres, pa dallim
Feje, përcolli për në banesën e fundit AT PJETER MESHKALLEN, Atdhetarin e flaktë dhe
të vendosun në idealin e Tij. Dijetarin mendjendritun e punëtorin e palodhun per unitetin
e Atdheut. Misionarin e vërtetë, Ushtarin e zdathun të Krishtit, Luftarin e paepun
të Demokracisë dhe të të Drejtave Njerëzore në Shqipni, Mësuesin e pavdekshem të rinisë,
kundërshtarin e papërkulun e të pathyeshëm përballë diktaturës komuniste. Shqipja
me kthetrat e Saja ka skalitë në një shkamb: “Edhe një Hero ma pak!”…”.(fq.
77)
Po Ai nuk des kurr, sepse: “ …
mbështetej mbi atë parim për të cilin edhe kujtohet prej shumë qytetarëve, të cilët
dikur e kishin ndigjue zanin e fuqishëm të Tij, tue ushtue prej predikatores së jezuitëve:
“… e, dyert e ferrit nuk kanë me fitue,…. Nuk kanë me fitue e,….. pra, … nuk kanë
me fitue!...”(fq. 134)
S’des,
sepse “…ia mërrijti asaj ditë që pat profetizue ma parë. Ai pau me sy, çka paralajmëroi,
diktatorët me të vërtetë hangrën kokat e njeni tjetrit e Atij nuk patën çka me i ba.
Ai dhe ideali i Tij, FITOI!(fq.135)
Kardinali Mikel Koliqi,
duke nënshkruar peticionin për dekorimin e Atë Meshkallës me Medaljen e Artë ‘Pishtar
i Demokracisë’, tha: “Ai e meriton, mbasi nuk asht arrestue kur u ka rá në mend
këtyne, por me punën e tij të palodhun për Fe e Atdhe, ua shtini vetë në mend se duhet
të arrestohej, gja që na të tjerët nuk e kemi bâ”.(fq.136)
Prof.
Arshi Pipa, shkruan për Patër Meshkallën: “… 25 vjet burg ndër burgjet
staliniste, peshojnë ndoshta edhe ma randë në kandarin e martirizimit, se pushkatimi”.(fq. 135) Pater Meshkalla nuk është vënë akoma në kandarin e martirizmit,
por besojmë se kur Kishës do t’i duket e arsyeshme ta vërë, do të peshojë shumë rëndë!