Rikthehet një mik i madh i kësaj toke: kështu shprehet rektori i Seminarit të Bresanones,
dom Ivo Muser, që na tregon si e pret Papën Benedikti XVI të hënën e ardhshme.
(25.07.2008 RV)Afrohet dita kur edhe Papa do të niset për të pushuar. Sivjet
zgjodhi bjeshkët e Bresanones, ku do të kalojë dy javë. Alto Adigje është një vend
që Papa e njeh mirë. E vizitoi për herë të parë në vitin 1967, me rastin e një takimi
me temën e rolit të meshtarisë, në të cilin merrnin pjesë rektorët e seminareve të
mëdha të kësaj zone gjermanofolëse. Pastaj ishte këtu kur u shugurua ipeshkëv e edhe
kur u krijua kardinal… Dhjetë vjet me radhë, nga viti 1977 deri në vitin 2004, i kaloi
pushimet pranë Seminarit të madh të Bresanones. Edhe sivjet Papa do të pushojë në
Seminar, ku rektori, dom Ivo Muser, e pret me gëzimin e atij që bëhet gati
të ritakojë një mik të vjetër, tejet të dashur. Ta dëgjojmë, në mikrofonin e Radios
sonë:
Përgjigje: - E presim me gëzim të madh e me emocion
të madh, natyrisht si papë, pasardhës i Shën Pjetrit, por edhe si mik të vjetër, që
e njeh mirë shtëpinë tonë, qytetin tonë, trojet tona.
Pyetje:
- Troje që i ka dashur gjithnjë. Në fund të fundit mund të themi se ka
30 vjet që kardinali Razinger një herë, Papa tani, shpreh dashurinë e tij për këtë
tokë…
Përgjigje: - Po, kështu është,
sepse hera e parë kur erdhi tek ne, si kryeipeshkëv e kardinal i Munihut, ishte viti
i largët 1977. Herën e fundit erdhi më 2004. E tanishmja është hera e 11-të që vjen.
E këtë herë, si papë.
Pyetje: - A
ju ka mbetur në kujtesë ndonjë cilësi e veçantë e kardinalit Razinger?
Përgjigje:
- Do të thosha sidomos thjeshtësia e tij. Ishte vërtetë një mysafir ndërmjet
mysafirëve. Kremtonte çdo ditë Meshën Shenjte, së bashku me të vëllaun, në kapelën
tonë. Hante në seminarin tonë, së bashku me meshtarët e tjerë, bisedonte me të gjithë,
shëtiste. Të prekte vërtetë me thjeshtësinë e tij.
Pyetje:
- Sipas jush, ç’vlerëson më shumë Papa në viset tuaja?
Përgjigje:
- Ndoshta atmosferën. Edhe peizazhin, qytezën tonë e ndoshta edhe kulturën
e gjuhën tonë.
Pyetje: - Papa natyrisht
vjen për të pushuar, por ne e dimë tashmë se pushimi i tij është shumë aktiv në aspektin
intelektual. Ndoshta kjo mund të jetë edhe një periudhë e frytshme…
Përgjigje:
- Sigurisht, e unë uroj të jetë. Uroj, sidomos, të kalojë ndonjë ditë çlodhjeje,
pushimi, meditimi. Pastaj këtu, në seminarin tonë, do të ketë në dispozicion bibliotekën,
si të lashtën, ashtu edhe modernen. E e dimë të gjithë se Papa është njeri kulture.
I pëlqen shumë të lexojë, të studiojë.
Pyetje:
- Pastaj, sigurisht, do të takohet edhe me njerëzit. Me meshtarët, sidomos.
Duke menduar për dhjetë pushimet e tjera të kardinalit Racinger ndërmjet jush, a kujtoni
ndonjë takim të veçantë?
Përgjigje: -
Kardinali ka bërë disa shëtitje e, gjatë tyre, është takuar gjithnjë me famullitarët,
me meshtarët e vendit. Këtë herë, natyrisht, do të jetë një takim i gëzueshëm, por
edhe zyrtar, në katedralen tonë, këtu në Bresanone, ku janë ftuar të marrin pjesë
të gjithë priftërinjtë: dioqezanë e rregulltarë.
Pyetje:
- Sapo thatë se, kur e njeh Papën nga afër, të prek posaçërisht ëmbëlsia
e tij, mirësjellja, mënyra si komunikon me çdo njeri…
Përgjigje:
- Është pikërisht kështu. Ëmbëlsia, thjeshtësia. E pastaj edhe aftësia
për t’i marrë seriozisht ata që takon, që i ka pranë.
Pyetje:
- Njeri i madh i kulturës, Papë intelektual, por edhe i pajisur me një
humor të hollë, të cilin duhet ta keni vërejtur edhe ju…
Përgjigje:
- Kështu është. Ne e vërejtëm këtë aftësi të tij, këtë dhanti, posaçërisht
gjatë drekave ose gjatë shëtitjeve.
Pyetje: -
Ndonjë kujtim i veçantë?
Përgjigje: -
Herën e fundi që ishte këtu, tek ne, pata nderin ta shoqëroja në Regensburg e, kur
po kalonim kufirin ndërmjet Austrisë e Bavarisë, kardinali më tha: “A e ndjen si ndërron
ajri, si bëhet më i mirë? Tani do të kemi ajrin më të mirë në botë: ajrin bavarez!”.
Shenjë e vogël e lidhjes së madhe që ka Papa me tokën e tij. Aspekt shumë njerëzor,
shumë simpatik. I përket mbarë botës, gjithë Kishës, por kjo nuk e shkëput aspak
nga rrënjët e veta.
Pyetje: - Ç’ uroni,
si rektor i seminarit, për këtë pushim të Papës ndërmjet sivëllezërve e besimtarëve
të dioqezës suaj?
Përgjigje: - Që kjo
periudhë me Papën në mesin tonë, të jetë nxitje e vërtetë shpirtërore. Kemi mes nesh
Papën. E kjo na nderon, por duhet të jetë edhe një nxitje për fenë, për përshpirtërinë
tonë.