Benedikti XVI para fluturimit drejt Romës: “DBR-së e Sidneit dëshmon se të rinjtë
janë shpresa e botës së nesërme”.
(21.07.2008 RV)Avioni me të cilin
udhëton Papa, vijon fluturimin drejt Romës: arritja në aeroportin e Çampinos parashikohet
për në orën 23.00. Avioni papnor u nis nga Sidnei në orën 10.00 me orën vendase, pas
ceremonisë së lamtumirës, gjatë së cilës Atin e Shenjtë e përshëndeti kryeministri
Kevin Rad. Përfundoi, kështu, vizita baritore e Benediktit XVI në Australi, për Ditën
XXIII Botërore të Rinisë. Një ngjarje e madhe, e paharrueshme – siç e quajti vetë
Papa. Ceremonisë së lamtumirës i parapriu takimi me vullnetarët, në Parkun e Madh
të Sidneit. Hollësirat për këto dy ngjarje, me të cilat përfundoi shtegtimi i nëntë
apostolik i Benediktit XVI – në shërbimin e të dërguarit të Radios sonë, Alesandro
Gjizoti, nga Sidnei: “You have opened your doors and your hearts…” “Ia
hapët portat tuaja e zemrat tuaja rinisë së botës e, në emër të këtyre të rinjve,
ju falënderoj!”: në ceremoninë e lamtumirës, Benedikti XVI u shprehu mirënjohjen Australisë
dhe Zelandës së Re, që i mikpritën me frymë thellësisht miqësore mijëra djemtë e vajzat,
ardhur nga të katër anët e botës. Papa kujtoi se të rinjtë dhe familjet e tyre flijuan
shumë, që të krijonin mundësinë të ishin pranë Papës në Australi. E për këto flijime
u shprehu mirënjohjen e mbarë Kishës. Më pas Ati i Shenjtë kujtoi, me emocion të
thellë, ditët prekëse kaluar në Sidnei dhe ripohoi se DBR-së u përket të rinjve.
Ata – nënvizoi Ati i Shenjtë – e bënë këtë Ditë ngjarje kishtare me karakter global,
kremtim të madh të rinisë, që u tregoi të gjithëve ç’do të thotë Kishë, popull i Zotit
në mes të botës, i bashkuar në fe e në dashuri dhe i frymëzuar nga Shpirti Shenjt
për ta dëshmuar Krishtin e ngjallur deri në skajet më të largëta të tokës. Pastaj
Benedikti XVI u ndalua tek njëri nga kremtimet më prekëse të DBR-së: “The
Stations of the Cross in the streets of Sydney…” “Stacionet e Udhës
së Kryqit nëpër rrugët e Sidneit – pohoi Papa – na kujtuan se Krishti na deshi deri
në fund të fundit e se Zoti vuan bashkë me ne, që të mund të gëzojmë bashkë me Të
në lumninë e Parrizit. Shenjtëria e tij kujtoi edhe takimin me të rinjtë e bashkësisë
së riedukimit. Ishte për mua një çast gëzimi e shprese - theksoi - shenjë se Krishti
mund të na ndihmojë edhe në situatat më të vështira, duke na rikthyer dinjitetin
tonë e duke na krijuar mundësitë të shikojmë përpara drejt një ardhmërie më të mirë.
Edhe një herë Papa vuri theksin mbi vlerën e takimit ekumenik e të atij ndërfetar,
gjatë të cilëve u ndje fort fryma vëllazërore dhe dëshira e thellë për më shumë bashkëpunim
në impenjimin për ndërtimin e një bote më të drejtë e më paqësore: World
Youth Day has shown us… “Dita Botërore e Rinisë – tha në përfundim Papa
– tregoi se Kisha mund të krenohet me të rinjtë e sotëm e të jetë plot shpresë për
botën e nesërme. Nga ana e tij, kryeministri australian, Kevin Rad, e falënderoi
Atin e Shenjtë për mesazhin e shpresës, të fesë e të arsyes, që i përcolli mbarë popullit
australian. Gjatë kësaj jave, të kaluar mes miqsh - tha Rad – e ndjemë se ju, Shenjtëri,
jeni një nga ne. Gjatë fjalimit, kryeministri dha edhe njoftimin për selinë e re të
ambasadorit të Australisë pranë Selisë së Shenjtë në Romë". Para
lamturmirës në aeroport, Papa u takua me vullnetarët e DBR-së në Doumein (Domain),
parku më i madh publik i Sidneit. Ishte një takim festiv. Mijëra të rinj e pritën
Atin e Shenjtë me entuziazëm, duke e ndërprerë disa herë me duartrokitje të stuhishme.
Gjatë përshëndetjes së tij, kardinali Pel pohoi se në DBR-së “Kisha duket ashtu siç
është në të vërtetë: plot me energji të zjarrtë ungjillore”.