Benedikti XVI të rinjve gjatë Natës së lutjes së DBR-së: “Besoni në fuqinë e Shpirtit
Shenjt për ta shndërruar botën”.
(19.07.2007 RV) Ndërsa Benedikti
XVI përfundonte Meshën, mijëra të rinj, që valavitnin flamujtë e vendeve të tyre,
përshkonin në këmbë kilometra e kilometra, për të arritur në Hipodromin e Rënduikut,
në portat e metropolit, ku morën pjesë në Natën e Lutjes me Papën, çast kulmor i kësaj
DBR-së. 250 mijë të rinj, 125 nga të cilët të ardhur nga 170 vende të botës, dëgjuan
fjalën e Benediktit XVI në hipodromin e Rënduikut, prej nga u drejtoi ftesën: “Pranojeni
Shpirtin Shenjt e besoni në fuqinë e Tij mbi jetën tuaj, në se doni ta shndërroni
botën!”. Benedikti XVI bëri një katekizëm të fuqishëm, kushtuar ‘Vetjes së harruar
të të Shenjtnueshmes Trini’ – siç u shpreh ai vetë. Por, ndonëse i harruar, i padukshëm
e i vështirë për t’u njohur, është gjithnjë Shpirti Shenjt “autor i veprave të Hyjit”.
Papa kujtoi edhe se Shpirti Shenjt realizon unitetin në dashuri, kundër çdo tundimi
që çon në përçarje e kundër utopive shpirtërore, që duan të ndërtojnë bashkësi të
përkryera, duke kapërcyer ligështitë e dështimet njerëzore. Por, për natën e lutjes
të shkojmë simbolikisht në Rënduik, prej nga na flet i dërguari i Radios sonë, Roberto
Piermarini:
"Hipodromi vigan i Rënduikut - si një
Çenakull i ri. Shpirti i Rrëshajëve zbriti sonte mbi 200 mijë të rinjtë e ardhur në
Sidnei nga të katër anët e botës për DBR-së. Duartrokitjet e stuhishme, koret e ritmuara
e valavitjet e vijueshme të flamujve ngjyra-ngjyra përshëndetën arritjen e Papës,
shoqëruar nga 12 shtegtarë, në tribunën e kuqe, mbi të cilën lartohej një kryq i ndritshëm
dhe ‘Zogu i Marzhorisë’, simbol i Shpirtit Shenjt, pikturuar nga një aborigjene. Me
Himnin e DBR-së, kënduar nga një kor prej 300 këngëtarësh në të gjitha gjuhët, hyrja
e Papës u parapri nga simbolet e Ditës: Kryqi dhe ikona e Zojës së Bekuar. Kur një
vajzë aborigjene ndezi qiriun e Pashkëve, simbol i Krishtit dhe i Shpirtit Shenjt,
12 të rinj ua kaluan flakën më të afërmve e, papritmas, sheshi vigan u shndërrua
në një qiell plot yje. Pastaj 7 të rinj iu lutën Shpirtit Shenjt, me ndërmjetësi të
Pajtorëve të DBR-së, ndërmjet të cilëve është edhe e Lumja Nëna jonë Terezë: In
accepting the power... Duke e pranuar pushtetin e Shpirtit Shenjt mund
t’i shndërroni familjet tuaja, bashkësitë, kombet. Veproni në mënyrë të tillë, që
dhuratat e dijes, të intelektit, të forcës, të shkencës e të mëshirës, të jenë shenjat
dalluese të madhështisë suaj. Kjo ishte porosia e Papës, fjalimi i të cilit qe një
himn i vërtetë, kushtuar Shpirtit Shenjt, të cilin duhet ta njohim – tha ai – në
se duam të bëhemi dëshmitarët e Tij. Benedikti XVI pohoi se në një botë të copëzuar,
që ka nevojë për paqe e harmoni, nuk mund ta realizojmë bashkimin e pajtimin me forcat
tona, por vetëm me ndihmën e Zotit e në bashkim me Kishën. Kush do t’ju shtyjë t’i
ndihmoni miqtë, që kalojnë një jetë pa kuptim? – pyeti Papa dhe vijoi: - Që nga fëmija
i braktisur në një kamp të Darfurit, tek një adoleshent i trazuar, një prind në ankth
në ndonjë nga periferitë, ngrihet një britmë e fuqishme që kërkon bashkim! Kush do
t’ju prijë në udhën e së vërtetës, për të dhënë dëshminë tuaj? Shpirti Shenjt, që
përmbush veprën e Krishtit. Kush e kërkon plotësimin e dëshirave larg Zotit – ikën
nga vetvetja. Hyji është në ne në realitetin e jetës, jo në fantazi. Realitei duhet
përballuar, nuk duhet braktisur. E Shpirti Shenjt do të na marrë përdore për të na
prirë në rrugën e vërtetë e reale, që të çon në bashkim me të Shenjtnueshmen Trini:
unitet si bashkimi ku Ati e Biri i dhurohen njëri-tjetrit, unitet si dashuria, që
s’mbaron; unitet si dhuratë ku Shpirti Shenjt është Hyj që dhurohet në amshim: It
is the Holy Spirit who brings…… Është Shpirti Shenjt ai, që realizon
bashkimin e mrekullueshëm të besimtarëve në Krishtin. Besnik ndaj natyrës së tij si
dhurues, e njëkohësisht si dhuratë, ai vepron sot përmes jush, të rinj. Të frymëzuar
nga Shën Agostini, bëni që masa juaj të jetë dashuria që bashkon; dashuria që i bën
ballë kohës të jetë sfida juaj e dashuria që dhurohet, misioni juaj. Kisha – vijoi
Ati i Shenjtë – duhet të rritet në unitet, duhet të forcohet në shenjtëri, të rinohet
e të rinojë, për virtyt të Shpirtit Shenjt”. Fjalimin
e Papës e pasuan çaste përqëndrimi në lutje e adhurimi të të Shenjtnueshmit Sakrament. Takimi
me Papën përfundoi e Ati i Shenjtë u rikthye në selinë e tij të kryeipeshkvisë, por
të rinjtë janë rishtas atje, duke adhuruar Sakramentin, duke u lutur e duke heshtur.
Do të rrinë gjithë natën nën yjet e do të presin ditën e nesërme për të marrë pjesë
në Meshën përfundimtare të DBR-së së Sidneit.