Takimi i Atit të Shenjtë me një grup të rinjsh të bashkësisë së riedukimit, pranë
Universitetit të Shën Marisë në Sidnei.
(18.07.2008 RV)Pas drekës, Papa u takua me të rinjtë e një bashkësie riedukimi,
pranë Universitetit të Shën Marisë. Njeriu – u tha Papa të rinjve, që përpiqen të
rikthehen në radhët e shoqërisë, duke hequr dorë nga veset shkatrrimtare - është krijuar
për jetën, por kur ndjek idhujt e botës, si të mirat materiale, dashurinë e parë si
pronë personale e dëshirën për pushtet, gjen vdekjen, humbet plotësisht kuptimin e
jetës. Bëhet si i babëzitur, nuk mendon më për të varfërit, sillet si pronar edhe
në sferën seksuale, kërkon të sundojë mbi të tjerët e mbi ambientin që e rrethon.
Duke rikujtuar shembëlltyrën ungjillore të Djalit plangprishës, Papa i nxiti gjithë
të pranishmit, që përpiqen të dalin nga tuneli i drogës, i alkoolit dhe i veprimtarive
kriminale vetdëmtuese, të jenë dëshmitarë për ata që po e humbasin jetën e tyre e
t’u tregojnë se Jezusi e Ati i Gjithëpushtetshëm i presin me krahë hapur, u ofrojnë
dashurinë e tyre të pakushtëzuar. Të rinjve të plagosur nga jeta, ish të droguar
e ish-alkolistë, por edhe viktima të shpërdorimeve seksuale, Papa u kërkoi të bëhen
ambasadorë të shpresës në gjirin e shokëve, që ndodhen në situata të ngjashme e t’i
bindin për t’u larguar nga rruga e vdekjes e për të dalë në dritën e jetës.