DBR: Katedralja e Shën Marisë, cak shtegtimesh; historia e saj pasqyron atë të katolikëve
të Australisë.
(17.07.2008 RV)Katedralja e Shën Marisë, në qendrën historike të Sidneit, Kishë-nënë
e të gjithë katolikëve australianë, kushtuar ‘Zojës Ndihmëtare’, Pajtore e Australisë,
është caku kryesor i shtegtimeve të kësaj Dite Botërore të Rinisë. Të premten e ardhshme,
Benedikti XVI do të kremtojë këtu fillimin e Udhës së Kryqit, në këmbë, mbi shkallaren
e Kishës, që shkëlqen nga bukuria. Katedralja nisi t’i tërheqë edhe më shumë besimtarët,
që kur këtu u vendos shtatorja prej bronzi e Gjon Palit II, shpikësit të DBR-së, vepër
e skulptorit Fiorenco Baçi nga Pordenone, dhuruar Kishës nga bashkësia e italianëve
të Sidneit. Në skulpturë, Papa paraqitet i zbathur, si Shën Françesku, shenjti i paqes
e i të mirave. Shembull elegant i gotikut revival, me fasadën e frymëzuar nga
Katedralja e Shën Marisë së Parisit, e pasur me harqe e me vetrazhe të mrekullueshme,
që krijojnë atmosferë thellësisht mistike, me dy kulla majëmprehta e një kriptë, Shën
Maria është katedralja më e madhe e krishterë dhe ndërtesa më e madhe ndërtuar me
gurë ranorë me reflekse të praruara, gurë me të cilët u ndërtua edhe Sidnei. E gjatë
107 metra, me navatën 24, 3 metra të gjërë, me majat e mprehta të dy kullave, që
lartohen mbi të, ndërtesa gotike arrin në lartësinë 75 metra. Historia e Katedrales
pasqyron vetë historinë e katolikëve në këtë vend, ku sot përbëjnë 27% të popullsisë,
përballë 18, 7% të anglikanëve. Por duhet të kujtojmë se kur kolonia u themelua nga
anglezët, ishin vetëm një pakicë, e shtypur dhe diskriminuar nga irlandezët, të cilët
i ndalonin rreptësisht ta praktikonin publikisht fenë e tyre. Ipeshkvi i parë katolik
arriti në Sidnei në vitin 1835 e kapela e vogël e Shën Marisë, që ngrihej në të njëjtin
vend, dalëngadalë u zgjërua, u lartua e u bë katedrale. E rrënuar plotësisht nga
një zjarr i rënë në vitin 1865, u rindërtua pjesërisht gjatë 20 vjetëve që pasuan,
ndërsa seksioni verior, ende i pakryer, u rihap më 1882. Katedralja u bë gati për
shugurim vetëm në vitin 1905, ndërsa navata qëndrore u krye në vitin 1928. Me të katedralja,
tashmë e rindërtuar plotësisht, fitoi një shkëlqim të ri, Në vitin 1930 Papa Piu
XI i dha titullin e Bazilikës Minore. Vetëm në vitin 2000, me rastin e Jubileut e
në përkim me Olimpiadën, u kryen së ndërtuari edhe dy majat e mprehta mbi dy kullat
ballore të kësaj katedraleje, ku kanë kremtuar Meshën Shenjte Papa Pali VI (1970)
e Papa Gjon Pali II (1986 e 1995). Nesër këtu do të jetë Benedikti XVI.Katedralja
e Zojës Ndihmëtare, që zë 3 mijë vetë, është zemër e DBR-së 2008.