"Беларускі Сыднэй" праз тэлемост сустракаецца з Папам
Мястэчка Івянец з 18 да 20 ліпеня стаецца месцам сустрэчы з Папам Бэнэдыктам XVI
пры дапамозе тэлемосту з Аўстраліі. Моладзь з усяго свету кожныя некалькі гадоў
збіраецца ў розных краінах і на розных кантынентах, каб яднацца ў малітве разам з
Папам. Сёлета Сусветны дзень моладзі адбываецца ў Сіднэі (Аўстралія). З Беларусі
прымае удзел група моладзі з некалькіх чалавек на чале з Генеральным вікарыем Мінска-Магілёўскай
архідыяцэзіі біскупам Антоніем Дзям’янкам.Паколькі ў далёкую Аўстралію змагла паехаць
абмежаваная колькасць беларускай моладзі, а ахвотных перажыць Сусветную сустрэчу моладзі
разам з Папам Бэнэдыктам XVI у сотні разоў больш, было вырашана арганізаваць свой
уласны «беларускі Сіднэй». Ім стала мястэчка Івянец (60 км ад Мінска) на тэрыторыі
Мінска-Mагілёўскай архідыяцэзіі. «Беларускі Сіднэй» з 18 да 20 ліпеня стаецца
сапраўдным месцам малітвы, радасці і сустрэчы з Папам Бэнэдыктам XVI. Маладыя людзі
змогуць сустрэцца з ім з дапамогай тэлемаста, які спалучыць Івянец і Сіднэй. Адбудзецца
два прамых уключэнні: у суботу 19 ліпеня а 11.00 гадзіне, калі адбудзецца вігілія
разам са Святым Айцом, і а 2.00 гадзіне ўначы 20 ліпеня, калі Папа будзе цэлебраваць
урачыстую Літургію, прамовіць казанне, а таксама абвесціць дату і месца правядзення
наступнага Сусветнага дня моладзі. Спецыяльна для гэтага будзе ўстаноўлены вялікі
светадыёдны экран. Кожная дыяцэзія (у Беларусі іх 4) падрыхтавала сваю прэзентацыю.
Формы прэзентацый розныя: пачынаючы ад музычнай і заканчваючы візуальнай.Падчас Міждыяцэзіяльнага
дня моладзі ў Івянцы адбудуцца таксама адмысловыя катэхезы. Адну з іх прамовіць да
беларускай моладзі Мітрапаліт Тадэвуш Кандрусевіч. Святую Імшу 19-га
ліпеня а 19.00 гадзіне будзе цэлебраваць кардынал Казімір Свёнтэк, а заключную
святую Імшу 20-га ліпеня — арцыбіскуп Тадэвуш Кандрусевіч.