Ipeshkvjtë Anglikanë të mbarë botës mblidhen në Konferencën e Lambeth: intervistë
e kardinalit Kasper.
(16.07.2008 RV)Filloi sot në Kanterbëri
të Anglisë, Konferenca e Lambeth, takim dhjetvjeçar i të gjithë ipeshkvijve anglikanë
të botës. Ngjarja e madhe, që organizohet pak ditë pas pohimit të parë të Bashkimit
Anglikan për shugurimin ipeshkvnor të grave, do t’i kushtohet temës: “T’i ndihmojmë
ipeshkvijtë ta kryejnë shërbimin e tyre baritor në misionin e Hyjit”. Nga 28 korriku,
deri më 3 gusht, do t’i ndjekë punimet e Konferencës edhe kardinali Valter Kasper,
kryetar i Këshillit Papnor për nxitjen e bashkimit të të krishterëve, që i uroi anglikanët
për këtë takim kaq të rëndësishëm. Por, ta dëgjojmë vetë Hirësinë e Tij, Valter
Kasper, në mikrofonin e Radios sonë:
Përgjigje: - Urimi
im është që të ruhet uniteti i Bashkimit anglikan, sepse askush nuk është i interesuar
për përçarje të reja. Nga ana tjetër, urimi im i dytë është të vijojë dialogu, sepse
dialogu ka rëndësi për gjithë botën e sotme. Kishat duhet të jenë të bashkuara, që
të mund ta dëshmojnë Ungjillin e të punojnë së bashku për paqen e drejtësinë në botë.
Këto janë dy urimet e mia. Gjithsesi nuk mund ta fsheh shqetësimin për zhvillimet
e fundit në Bashkimin anglikan: kryesisht për pranimin e shugurimit meshtarak e ipeshkvnor
të grave. Pastaj për problemet tjera etike, për homoseksualitetin... Këto nuk janë
në qendër të Ungjillit, por janë çështje etike, të lidhura me antropologjinë e edhe
me dëshmimin e Biblës. E gjithë kjo të shtyn të bësh pyetjen: si mund të merret seriozisht
Besëlidhja e Re, që të flet qartë për bindjen ndaj urdhërimeve të Tënzot? Duhet të
flasim për këto probleme e pastaj të reflektojmë së bashku si ta vijojmë dialogun.
Ne jemi gati ta vijojmë, por tani qëllimi i dialogut, bashkimi i plotë, nuk është
më realist. Prej këndej, dialogu do të ketë një karaketr të ndryshëm e duhet të shikojmë
edhe se kush do të jenë partnerët tanë, cila do të jetë forma, që do të marrë Bashkimi
anglikan pas Konferencës së Lambeth. Janë probleme shumë të rëndësishme, shumë shqetësuese,
por, e përsëris, ne duam unitetin e Bashkimit anglikan; e duam edhe të vijojmë dialogun,
e jo një dialog dosido, por një dialog sipas vullnetit të shprehur nga vetë Jezu Krishti
natën para se të vdiste: “ut omnes unum sint”:“që të gjithë të jenë një gjë e vetme!”.