Dita e 14 korrikut për Benediktin XVI në Kënthërs kaloi me lutje, lexime e çaste
muzikore, ndërsa në Sidnei arrin Kryqi i DBR-së. Me ne Atë Federiko Lombardi.
(14.07.2008 RV)“Një gur kilometrik për historinë e Kishës në Australi”. Entuziazmi
për praninë e Benediktit XVI përmblidhet në këto fjalë të kardinalit Gjorgj Pel, kryeipeshkëv
i Sidneit, i cili sot jetoi çaste të paharrueshme emocioni, kur pa duke arritur
nëpër det Kryqin e Ditës Botërore të Rinisë. Ndërsa rinia vijon veprimtaritë në të
katër anët e Australisë e të botës, Papa e kaloi ditën në mes të blerimit të Kenthëst
Sente, me shëtitje e koncerte, dhënë për nder të tij. Në metropolin australian
arrijnë grupet e fundit të të rinjve e vijojnë takimet e katekizmit; shtohen edhe
takimet me gazetarët. Në një prej tyre e mori fjalën edhe zëdhënësi i Sallës së Shtypit
të Selisë së Shenjtë, Atë Federiko Lombardi, i cili bëri pikërisht kronikën
e ditës së dytë të Papës në tokën australiane, për të folur më pas për vizitën e kardinalit
Bertone në Paramata e për dhuratën që i bëri Papës ipeshkvi i Darvinit, imzot Hurlei,
gjatë ndalesës së Papës në veri të Australisë. Ta dëgjojmë në mikrofonin e Radio Vatikanit: Përgjigje:
- Ishte një ditë shumë e qetë, që Papa e kaloi fare normalisht, dua të
them, duke e transferuar ritmin e tij të jetës romake, në Australi. Ati i Shenjtë
e filloi ditën me Meshën Shenjte, natyrisht të kremtuar me personelin e qendrës që
e mikpret e me sekretarët e tij; pastaj bëri një shëtitje të shkurtër e vijoi me lexim,
lutje, e më pas, me përgatitjen e teksteve të fjalimeve, siç bën gjithnjë në Vatikan.
Pak para drekës priti kardinalin Pel dhe imzot Fisher, drejtues kryesorë të DBR-së,
të cilët e njoftuan për të rinjtë që vijojnë të arrijnë e për dorën e fundit që po
u jepet përgatitjeve. E pastaj, pasdite, përsëri lutje, një shëtitje e shkurtër në
parkun, që është shumë i bukur e edhe një koncert. Ishte një grup muzikor i njohur
i Sidneit, që dha një koncert me muzikë klasike nga autorë shumë familjarë për Papën:
Shuman e Moxart. Edhe ky një çast prehjeje, pastaj, darka, si gjithnjë.
Pyetje:
- Ndërsa kardinali Bertone shkoi në Paramata për të kremtuar Meshën Shenjte…
Përgjigje:
- Po, grupi shoqërues ndjek një program të pavarur nga ai i Atit të Shenjtë,
i cili vijon të jetë në Kenthëst Sente me shumë pak shoqërues. Prandaj sot paradite
grupi shoqërues i Papës vizitoi jo vetëm Sidnein e rrethinat, por edhe katedralen
e Paramatës, kryekishë e dioqezës fqinje, dioqezë e lashtë, me rëndësi në fillimet
e historisë australiane. Katedralja është tejet moderne e shumë e bukur. Tepër interesante
në këndvështrimin e arkitekturës kishtare, u ndërtua pas djegies së katedrales së
mëparshme.
Pyetje: - Disa agjensi shtypi
flasin për një dhanti: “Zojën e aborigjenëve”, që iu dhurua Papës në Darvin…
Përgjigje:
- Po, e më duket një lajm i bukur. Pastaj duhet thënë se është diçka e
zakonshme që Papa të pritet me dhurata simbolike, të cilat përfaqësojnë kulturat vendase.
E dihet se atje, në veri të vendit, është zona ku aborigjenët janë më të përhapur.