(13.07.2008 RV)Sot Kisha katolike kremtoi të Dielën XV të Kohës së zakonshme
gjatë vitit kishtar. U përkujtuan edhe Shën Enriku perandor, Shën Esdra skribë e Shën
Sila, dishepull i apostujve.
Shën Kamili Lelis, meshtar, themelues i Shërbëtorëve
të të sëmurëve, që do të kremtohet të hënën, na kujton se duhet të mësohemi
ta mbartim kryqin, me bindjen se çdo flijim në emër të Zotit, është një hap përpara
drejt Tij e drejt mbretërisë së amshuar.
Je ti, o Zot, forca e popullit tënd!
Këtë thirrje na fton të përsërisim liturgjia e së martës, ditëfeste e Shën
Bonaventurës nga Banjoregjio, kardinal, ipeshkëv i Albanos e dijetar i Kishës, françeskan.
Na kujton se indiferenca e Galilesë përballë mrekullive të Krishtit, shkaktoi përbuzjen
e Zotit e rrënimin e qytetit. Të mos çuditemi, prandaj, për pasojat, kur nuk e pranojmë
Jezusin në jetën tonë. Zoja Karmë, që do të kremtohet të
mërkurën, na kujton Karmelin, mal që lartohet gjatë bregut lindor të Mesdheut,
pikërisht në lartësinë e Galilesë, me shpatet plot shpella natyrore, të cilat u pëlqejnë
aq shumë eremitëve. Më i njohuri ndër këta njerëz të Zotit, ishte profeti i madh,
Elia, i cili në shekullin IX para Krishtit mbrojti pastërtinë e fesë në një Zot të
vetëm e të vërtetë nga rreziku i përlyerjes me kultet idhujtare. Pikërisht duke u
frymëzuar nga figura e Elisë, në Lindje lindi Urdhëri kundrues i Karmelitanëve, familje
rregulltare që numëron në radhët e veta shenjtorë të mëdhenj si Tereza e Avilës, Shën
Gjoni i Kryqit, Tereza e Krishtit Fëmijë e Tereza Benedikta e Kryqit (në shekull Edit
Shtain).
“Mësoni nga unë, që jam zemërbutë e i përvujtë!”. Ky është modeli
që na propozon Jezusi nga liturgjia e së enjtes, në festën e Shën Marçelinës,
të Shën Aleksit e të Shën Leonit papë . Të premten do të kremtohen Shën
Emiliani martir; Shën Bruni, ipeshkëv e Shën Federiku. Na kujtojnë se Jezusi kërkon
prej nesh mëshirë e dashuri.
Krishti erdhi në botë për t’u bërë shërbëtor i
të gjithëve, prandaj të gjithë mund të shpresojnë në Të. Këtë na kujton liturgjia
e festës së Shën Simakut papë dhe e Shën Makrinës, që do të përkujtohen të shtunën.
Të
dielën e ardhshme Kisha do të vijojë liturgjinë e Kohës së zakonshme gjatë vitit
kishtar, duke kremtuar të dielën XVI të kësaj kohe.