Reflektim i atë Federiko Lombardit: “Pjetri, Pali, Bashkimi”.
(06.06.2008 RV)Duke vijuar editorialet
e tij të fundjavës, sot drejtori i Radios sonë, Atë Federiko Lombardi, e titullon
reflektimin: “Pjetri, Pali, Bashkimi”.
“Hapja
solemne e vitit kushtuar Shën Palit dhe kremtimi i solemnitetit të Shenjtorëve Pjetër
e Pal në Bazilikën e Shën Pjetrit, me pjesëmarrjen e përfaqësuesve të ndryshëm të
Kishave e bashkësive të krishtera e, në mënyrë të posaçme, të Patrikut të Kostandinopojës,
Bartolomeut I, ishin çaste shprehëse të takimit ekumenik. E kjo, sepse pikërisht me
kumtimin e Ungjillit e me kremtimin liturgjik matet më mirë temperatura e ekumenizmit
ndërmjet të krishterëve; aty ndjehet lidhja me zanafillën e përbashkët e vetëm prej
aty mund të nisë ecja drejt bashkimit. Edhe Patriku Ekumenik e shpalli vitin 2008
“Vit të Shën Palit Apostull”. Shën Pali, autor i shkrimeve më të vjetra
e më të plota të Besëlidhjes së Re, i apasionuar e i fituar nga Krishti, misionar
me horizont universal, na mësoi ta shikojmë konkretisht Kishën si Korp të Krishtit. “Si
mundët ta coptoni Korpin tim?”- është pyetja, së cilës Papa iu përgjigj dhe e propozoi
pak ditë më parë, duke medituar mbi përçarjet ndërmjet të krishterëve. Në
kremtimin e madh eukaristik, Papa e Patriku ishin së bashku pranë elterit për liturgjinë
e fjalës, homelinë dhe besojmën e fesë, ashtu si edhe në përqafimin e paqes e në bekimin
përfundimtar; por nuk mundën të jenë së bashku në liturgjinë eukaristike. Prandaj
vijon të jetë e nevojshme lutja e flaktë: “Na bashko përsëri, o Zot, duke na ndihmuar
t’i sheshojmë të gjitha përçarjet!”. Buka është një e vetme, prandaj ne, megjithëse
shumë, jemi një korp i vetëm”. Kur do të arrijmë një bashkim më të plotë? Varet edhe
nga lutja jonë, nga dashuria jonë, nga feja jonë!".