365 ditë me njerëz e ngjarje që ia ndryshuan faqen botës: "Luiza de Marijak, vejusha
e re që krijon rregulltare të mira".
(06.07.2008 RV)Trokasin në portë.
Luiza vrapon ta hapë. Para saj shikon një fshatare të re. “Mirëdita!”, e përshëndet
Luiza “Si mund t’ju ndihmoj?”. “Më quajnë Gjovana e dëshiroj të bashkohem me bijat
e Bamirësisë”. “Do të jemi tepër të kënaqura t’ju pranojmë mes nesh, Gjovanë. Lëri
këtu plaçkat e eja të hash me ne”. Luiza dë Marijak e shoqëron të sapoardhurën
në dhomën e bukës, ku e presin tetëdhjetë simotrat. “Gjovanë, ju paraqes Bijat
e Bamirësisë”, i thotë Luiza, duke i treguar bashkësinë e vogël. “Vajza, kjo është
Gjovana. Dëshiron të jetojë me ne, t’u shërbejë, së bashku me ne, të varfërve, për
lumni të Zotit”. Një brohori e lehtë shpërthen njëherësh nga tetëdhjetë gojë në
dhomën e bukës. Është shenja e miratimit për motrën e re. Gjovana ulet pranë njërës
nga tryezat, ku simotrat shtyhen për t’i bërë vend. Pas bekimit, mund të fillojë dreka.
Gjellët janë të shijshme, sepse Bijat e Bamirësisë punojnë shumë e nuk mund ta përballojnë
mundimin e ditës, në se nuk ushqehen mirë. E Gjovana do ta provojë shumë shpejt këtë.
Ndërsa shikon këto gra që hanë të ulura njëra pas tjetrës, Luiza de Marijak rikujton
udhën e gjatë që bëri, për të arritur deri këtu. E kush do ta kishte besuar, pesëmbëdhjetë
vjet më parë, se do të përfundonte në këtë vend? Në se nuk do ta kishin ndihmuar i
biri, Mikeli e Vinçenc de Paoli, tani ndoshta do të vijonte të lotonte mbi rrasën
e një varri të dashur. E pati tepër të vështirë ta merrte veten, pas vdekjes së shokut
të jetës… Dhimbja e madhe do ta kishte mbytur edhe atë vetë. Po Mikeli ia riktheu
gëzimin e të jetuarit e Vinçenc de Paoli e ndihmoi të realizonte endrrën e saj: t’i
kushtohej plotësisht shërbimit të të varfërve. Së bashku me Vinçencin, Luiza krijoi
një bashkësi rregulltaresh, që nuk rrinë të mbyllura në kuvend. Dëshira që ‘motrat
e saj të mira’ të shkonin për t’i ndihmuar të varfërit rrugëve, u realizua. Në
vitin 1633 Luiza nis të mbledhë Bijat e para të Bamirësisë, që veshin një zhgun të
thjeshtë e mbathin sandale edhe më të thjeshta. E kështu të veshura, fillojnë misionin
e tyre udhëve e spitaleve, kudo i thërret zëri i të varfërve. Kanë vetëm një pasuri,
për të lehtësuar mjerimin që rëndon mbi botën: buzëqeshjen, lutjet e… atë që u dhurojnë
zonjat e bamirësisë, gratë e aristokracisë, që vendosin të ndjekin shembullin e Luizës,
duke vijuar të jetojnë në shtëpitë e tyre. I ndihmojnë rregulltaret, duke qepur çarçafë
e veshje për vëllezërit më të pafat e duke gatuar gjellë, që motrat, pastaj, i shpërndajnë
atje ku ka më shumë uri. Në vitin 1642 Bijat e para të dashurisë bëjnë kushtet
së bashku me Vinçenc de Paolin. Më pas urdhëri do të ketë edhe Rregullën e jetës,
e cila do të tërheqë shumë dëshirtare, si Gjovana, në Francë e në mbarë botën. Vepra
e Luizës de Marijak, që përpiqet të lehtësojë vuajtejet e njeriut e mjerimin e botës,
vijon të përhapet…