Salla e Shtypit e Vatikanit njofton programin e shtegtimit apostolik të Papës në Francë.

(04.06.2008 RV) Salla e Shtypit e Selisë së Shenjtë njoftoi sot se Benedikti XVI do të shtegtojë në Francë nga 12 deri më 15 shtator. Do të vizitojë Parisin e do të jetë në Lurdë me rastin e 150-vjetorit të Dukjeve të Virgjërës Mari para bareshës së vogël, Bernardetës Subiru.
Sipas parashikimit, Benedikti XVI do të arrijë në Paris më 12 shtator e menjëherë do të vizitojë presidentin Nikolas Sarkozi në Elizeo, për të vijuar, më pas, takimet me autoritetet e tjera të shtetit francez. Do të takohet edhe me përfaqësuesit e Bashkësisë Hebraike në Nunciaturën Apostolike të Parisit.
Të shtunën, më 13 shtator, parashikohet një takim me botën e kulturës në Kolezhë dë Bernardë të Parisit, një vizitë në Institutin e Francës, një takim me të rinjtë dhe Mesha e madhe në Esplanadë des Envalidë të Parisit. Në mbrëmje, nisja me avion nga aeroporti i Orlì (Paris) për në aeroportin e Tarbë-Lurdës. Në qytetin-shenjtërore të Pirenejve, Papa do të qëndrojë deri të hënën, 15 shtator e, ndërmjet impenjimeve të tjera, parashikohet edhe takimi me Konferencën Ipeshkvnore të Francës.