Papa lutet që në Kolumbi të mbretërojë paqja e qëndrueshme dhe e drejtë.
(02.07.2008 RV)Papa lutet me gjithë
zemër që në Kolumbi të marrin fund dhuna, rrëmbimet, kërkimi me forcë i parave” e
në vendin latinoamerikan të mbretërojë paqja e qëndrueshme dhe e drejtë. Fjalët e
Benediktit XVI u transmetuan dje, përmes një videomesazhi, drejtuar Asamblesë së 85-të
plenare të Episkoptatit kolumbian. 90 pjesëmarrësit, ipeshkvij e kryeipeshkvij, janë
mbledhur, që të dielën e kaluar, në Shenjtëroren e Zojës Rruzare të Kikuinkuirës,
në Kolumbi, për të kremtuar njëqind vjetorin e themelimit të Konferencës ipeshkvnore
kolumbiane. “Si Barinj të Kishës, detyra jonë është t’i prijmë e ta udhëheqim në
rrugë të drejtë popullin e Zotit, që ka nevojë të shikojë në ne, njerëzit e vërtetë
të Hyjit… si apostuj e misionarë, ndihmojmë ata që janë afër, por edhe ata që janë
larg, për të gjetur në Krishtin, jetën në kuptimin e plotë të kësaj fjale, të cilën
aq shumë e dëshirojnë”. Kështu shprehet Papa në videomesazhin drejtuar prelatëve kolumbianë,
të mbledhur në asamblenë e tyre për të kremtuar 100-vjetorin e lindjes së Konferencës
ipeshvnore kolumbiane, themeluar me vendim të Koncilit I Plenar të Amerikës Latine.
Papa i nxit ipeshkvijtë t’i ndihmojnë vëllezërit, duke u shërbyer posaçërisht më të
varfërve e duke u përcjellur atyre mesazhin e paqes, të drejtësisë, të pajtimit: ““Quiero
decirles que en este…" Dëshiroj t’ju them se në këtë punë nuk jeni vetëm.
Ju shoqëroj me lutjen e afërsinë shpirtërore në përpjekjet tuaja për ta bërë Ungjillin
të jehojë në të katër anët e trojeve kolumbiane, përmes nismave të filluara në fushën
e punës baritore edukative e universitare si dhe vëmendjes që i kushtoni të burgosurve,
të sëmurëve, të moshuarve, indianëve, punëtorëve, të shpërngulurve, të rinjve e familjeve”. Benedikti
XVI kujton edhe ‘dëshminë e zellin apostolik’ të barinjve, që morën pjesë në Konferencën
e parë ipeshkvnore të Kolumbisë, në vitin 1908: dëshmi që i fton të gjithë t’u përgjigjen
sfidave të sotme në Kishat e vendeve të tyre: “No puedo olvidar tampoco…" Nuk mund të harroj edhe kujdesin për të qenë njerëz të harmonisë, në thirrjet
tuaja të vazhdueshme kundër dhunës, rrëmbimit, kërkimit të parave e formave të tjera
të kërcënimit,që pësojnë shumë bij të kësaj toke të dashur. I lutem me gjithë zemër
Zotit që këto situata, të cilat kanë shkaktuar shumë dhimbje, të marrin fund një
herë e mirë e në Kolumbi të mbretërojë paqja e qëndrueshme dhe e drejtë, në atmosferën
e shpresës e të mirëqenies”. Në përfundim të fjalimit, Papa kërkon mbrojtjen
e Zojës Rruzare të Kikuinkuirës. E pikërisht në Shenjtëroren që i kushtohet Asaj,
janë mbledhur, në përfundim të një shtegtimi, ipeshkvinjtë kolumbianë, që po reflektojnë
për temën: “Kujtesa historike e Konferencës ipeshkvnore të Kolumbisë në kremtimin
e njëqindvjetorit të saj të parë”. Figura e Zojës Rruzare është pikturuar mbi një
pëlhurë të 1500-ës, ndërmjet Shëna Ndout e Shën Andreut apostull. Kjo figurë, pasi
qe dëmtuar rëndë, u riduk mrekullisht përsëri, pasi pati lëshuar një dritë të jashtëzakonshme.
Që nga kjo kohë, drejt shenjtërores nisën shtegtimet e mrekullitë. “Kemi më shumë
se kurrë nevojë për dritën e Saj” – tha në hapje të Konferencës imzot Augusto Kastro
Kuiroga, kryeipeshkëv i Tunjës e kryetar i Konferencës ipeshkvnore kolumbiane.