Papa në audiencën me kryeipeshkvijtë e rinj metropolitë, të nesërmen e vendosjes së
Palios: “Misioni i bariut lind nga dashuria për Krishtin”.
(30.08.2008 RV)Në një atmosferë
bashkimi familjar, Benedikti XVI u takua sot paradite me 40 kryeipeshkvijtë e rinj
metropolitë, të cilëve dje u vuri Palion, në sa kremtonte solemnitetin e Apostujve
Pjetër e Pal. Në audiencë Papa – që e shqiptoi fjalimin në shumë gjuhë – foli kryesisht
për Krishtin, burim i vërtetë i shërbimit ipeshkvnor. Më pas ritheksoi rëndësinë e
Vitit kushtuar Shën Palit, që u hap të shtunën e kaluar. Viti kushtuar Shën Palit,
që sapo filloi, përforcoftë fenë e të krishterëve dhe lidhjet e tyre me Kishën e me
barinjtë e saj: këtë u uroi Benedikti XVI shtegtarëve, të mbledhur në Sallën e Palit
VI, së bashku me ipeshkvijtë e tyre metropolitë, një ditë pas vendosjes të stolës
së Palios nga ana e Atit të Shenjtë.Duke kujtuar atmosferën e bashkimit, që ndjehej
fort në takimin me kryeipeshkvijtë e rinj metropolitë, Papa theksoi: “Të kujtojmë
gjithnjë se për çdo Bari, kushti i shërbimit të tij është dashuria për Krishtin, mbi
të cilin nuk duhet vënë asgjë. “Simoni i Jonës, a më do?”. Pyetja që Jezusi i bën
Pjetrit, duhet të kumbojë gjithnjë në zemrën tonë, vëllezër të dashur, e të na nxisë
të japim përgjigjen, përherë të re e prekëse: “Zot, ti di gjithçka; ti e di se të
dua”.