Me kremtimin e ‘Lutjeve mbrëmësore ekumenike’ filloi Triditshi i përgatitjes për hapjen
e Vitit kushtuar Shën Palit.
(27.06.2008 RV)Mbrëmë, me kremtimin e mbrëmësoreve ekumenike, në Bazilikën
romake të Shën Palit jashtë Mureve, filloi Triditshi i lutjeve të përgatitjes për
hapjen e Vitit Paolin, që do të përfundojë nesër, me hapjen solemne të këtij Viti
nga ana e Benediktit XVI. I kryesuar nga abati benediktin, atë Edmund Pauer, riti
mblodhi rreth Varrit të Apostullit të Popujve, autoritete kishtare e besimtarë katolikë,
ortodoksë e protestantë. Duke u drejtuar të pranishëmve një përshëndetje të përzemërt,
kardinali Valter Kasper, kryetar i Këshillit Papnor për nxitjen e bashkimit të të
krishterëve, theksoi: “Viti kushtuar Shën Palit na fton t’i lexojmë e t’i meditojmë
përsëri Letrat e Apostullit, për të thelluar, kështu, njohjen e dashurinë tonë ndaj
Krishtit e për t’u bërë, ashtu si Shën Pali, dëshmitarë të guximshëm të Zotit, pishtar
drite, që ndriçon udhët e njerëzimit e mjet që i bashkon të krishterët e ndarë në
një gjë të vetme, që bota të besojë.Ju uroj një Vit të bekuar Paolin – tha në përfundim
kardinali Kasper – vit që nuk mund të mos jetë edhe, e kryekreje, ekumenik!”.