29 чэрвеня 2008 г. у Рыме з рук Святога Айца Бэнэдыкта XVI атрымае палій 41 іерарх
з розных частак свету. Сярод прызначаных за апошні год кіраўнікоў касцёльных правінцый,
якія атрымалі гэтую адзнаку асаблівага служэння, — Мітрапаліт Мінска-Магілёўскі арцыбіскуп
Тадэвуш Кандрусевіч.
Ва ўрачыстасць святых Апосталаў Пятра і Паўла палій таксама
атрымае першы грэка-каталіцкі Мітрапаліт Прэшава (Славакія) арцыбіскуп Ян Баб’як SI.
Папа
Бэнэдыкт XVI разам з новымі мітрапалітамі будзе канцэлебраваць святую Імшу ў базыліцы
святога Пятра. Ва ўрачыстасці прыме ўдзел Патрыярх Канстанцінопальскі Барталамей І.
Святы Айцец прамовіць гамілію супольна з праваслаўным іерархам. Пантыфік і Патрыярх
разам прамовяць вызнанне веры і ўдзеляць благаслаўленне.
Палій (лац. pallium)
— элемент літургічнага адзення ў выглядзе вузкай стужкі з белай авечай воўны з вышытымі
воўнаю чорнымі крыжамі; на канцах — з абшытымі чорным шоўкам кавалачкамі свінца. Насіць
палій мае права Святы Айцец (падчас кожнай Літургіі), а таксама адзначаныя асаблівым
гонарам іерархі Касцёла (толькі на вялікія святы).
Палій Святога Айца сімвалізуе
паўнату яго ўлады, палій арцыбіскупаў — паслухмянасць Папе і іх асаблівую блізкасць
да Святога Пасаду. Catholic.by