Papa ambasadorit të ri të Gabonit pranë Selisë së Shenjtë: “Nuk ka paqe, pa luftë
kundër korrupsionit e padrejtësive!".
(26.06.2008 RV)“Në Afrikë nuk mund të ketë paqe, pa shkuljen nga rrënjët të
çdo forme të korrupsionit e pa respektimin e rregullave të drejtësisë. Përndryshe,
qytetarët e humbasin plotësisht besimin në udhëheqësit e tyre”: këtë theksoi sot Ati
i Shenjtë, duke pritur në audiencë ambasadorin e ri të Gabonit pranë Selisë Apostolike,
Firmin Mboutsou, që paraqiti në Vatikan letrat kredenciale. E duke zgjëruar horizontin,
Papa kujtoi se tepër shpesh ardhmëria e botës lidhet me çështje thjeshtë ekonomike,
që bëhen burim konfliktesh. Banorët e një vendi – tha në përfundim Benedikti XVI –
duhet të përfitojnë të parët nga pasuritë natyrore të kombit e ne të gjithë duhet
të bëjmë ç’është e mundur t’i lëmë trashëgim breznive të ardhshme një tokë ku mund
të jetohet, që është në gjendje t’i ushqejë mirë të gjithë banorët e saj.Gaboni,
një nga vendet afrikane që shquhen për pasuri natyrore, i cili pranoi sistemin demokratik
pluralist që në vitet ’90, ka rreth 2 milionë banorë, gjysma e të cilëve, katolikë.