Lidhja Botërore e Islamit organizon Konferencën me të krishterët e hebrejtë.
(25.08.2008 RV)Nga 16 deri më 18 korrik, Lidhja myslimane botërore, me seli
në Mekë, do të organizojë në Madrid, një Konferencë ndërkombëtare kushtuar dialogut
ndërfetar ndërmjet myslimanëve, të krishterëve e hebrejve. Njoftimin e jep gazeta
vatikanase ‘L’Osservatore Romano’ mbi bazën e lajmit të dhënë nga sekretari i përgjithshëm
i Lidhjes, Abdallah-Mohsen Al-Turki. “Kjo tregon – sqaron gazeta vatikanase - se është
pranuar thirrja e përsëritur disa herë, e përherë të fundit gjatë Konferencës islamike
ndërkombëtare në Mekë, nga Abdallah bin Abdulaziz Al Saud, mbreti i Arabisë Saudite
e rojtar i dy xhamive të shenjta. Mbreti saudit kërkoi të shfrytëzohen të gjitha rastet
për takime, në mënyrë që të përmirësohet figura e fesë myslimane, dëmtuar nga akuzat
e terrorizmit pas atentateve tragjike të 11 shtatorit 2001. Ulematë e pranishëm në
Konferencë e mbështetën këtë thirrje dhe – gjithnjë sipas njoftimit të ‘L’Osservatore
Romano’- propozuan të krijohet një qendër, që të punojë për dialogun ndërmjet feve
të ndryshme.