365 ditë me njerëz e ngjarje që ia ndryshuan faqen botës: "Dyzet Orët: maratona e
lutjes".
(24.06.2008 RV)Shfaqje e pabesueshme!
Kremtohen Rrëshajët e vitit 1598 e sot burra e gra, pleq e fëmijë, fisnikë e fshatarë,
banorë të Milanos, i kërkojnë falje njëri-tjetrit për fyerjet që kanë bërë e për grindjet,
që i kanë përçarë. Premtojnë se do të bëjnë të pamundurën, që në qytetin e tyre
të mbretërojë paqja. Gjithçka ka nisur nga një dyzetorëshe. Kur këmbanat e të gjitha
kishave ranë njëherësh. Në këtë çast popullsia u gjunjëzua e mbarë qyteti tha njëzëri
pesë Atyna e pesë FalemiMari, për të nderuar pesë plagët e Krishtit. Pastaj filluan
procesionet: nën dritën e qirinjve, milanezët ndjekin të Shenjtnueshmin Sakrament,
Hosten e shuguruar. Disa prej tyre ecin zbathur, të tjerë kanë veshur rroba varfanjakësh,
për të bërë pendesë e, në fund, të gjithë marrin pjesë në Meshën Shenjte kushtuar
një ndjeti të posaçëm: të çojnë paqen në zemrat e njerëzve. Burra e gra e fëmijë
luten për dy ditë me radhë, ndjekin e adhurojnë të Shenjtnueshmin Sakrament. Tani
kthehen të gjithë në shtëpi, sepse adhurimi i Katërdhjetë orëve përfundoi. Premtuan
se do të mundohen që në jetën e tyre të mbretërojë paqja e Krishtit e se do të përpiqen
t’i mbajnë premtimet ditë për ditë. Ka më se gjashtëdhjetë vjet që milanezët i
kremtojnë Dyzet Orët çdo vit me rastin e Pashkëve, të Rrëshajëve, të Ngjitjes së Krishtit
në Qiell e të Krishtlindjes. Por në vitin 1598 kremtimi ndryshon shumë, në krahasim
me atë të zanafillës. Bëhet më solemn: adhurohet i Shenjtnueshmi, kryhen sjelle pendestare,
bëhen ndjete për paqen, kremtohen procesione me qirinj të ndezur, që e kthejnë natën
në ditë. Nuk është më lutje individuale, e heshtur, e besimtarëve. Tani reflektimin
e atyre që mblidhen për të adhuruar të Shenjtnueshmin Sakrament e kryeson një predikatar.
Në homelinë e tij nënvizon nevojën e pendesës së sinqertë e të shpërblimit të mëkateve.
Dyzet Orët kthehen në një rast të çmuar për të kërkuar falje, për të falur e për të
rrëfyer mëkatet, duke u pajtuar kështu me Hyjin e me të afërmin. Në këtë ditë të ndritshme
pranverore, predikatari e milanezët, duke u kthyer në shtëpi, nuk e dinë se lutjet
që sapo përfunduan do të sjellin fryte për shumë shekuj. Dyzet Orët përhapen… në Itali
e në Evropë, në botë e në kohë! E vijojnë edhe sot e kësaj dite: ndër të gjitha Kishat
e Botës besimtarët ftohen për të adhuruar të Shenjtnueshmin Sakrament!