Më 28 qershor Benedikti XVI do të hapë Vitin Paolin në bazilikën romake të Shën Palit
jashtë Mureve, me pjesëmarrjen e Patrikut ekumenik, Bartolomeu I.
(23.06.2008RV)Të shtunën e ardhshme,
në solemnitetin e Shenjtorëve Apostuj Pjetër e Pal, Benedikti XVI do të kryesojë,
duke nisur nga ora 18. 00, në bazilikën romake të Shën Palit jashtë Mureve, kremtimin
e Lutjeve të para mbrëmësore të Solemnitetit, me rastin e hapjes së Vitit Paolin.
Në kremtim – sipas njoftimit të Zyrës së kremtimeve liturgjike – do të marrin pjesë
edhe Patriku ortodoks ekumenik, Bartolomeu I, si dhe përfaqësues të Kishave e të bashkësive
të tjera të krishtera. “Është një ngjarje e madhe shpirtërore e baritore, që mund
e duhet të përforcojë në shpirtin e besimtarëve besimin në Jezu Krishtin, i cili
vijon të na bëjë thirrje ta predikojmë e ta dëshmojmë Ungjillin e tij pa frikë e pa
droje”. Këtë theksoi dje Papa gjatë lutjes së Engjëllit të Tënzot, duke sintetizuar
me këto fjalë, vlerat e Vitit Paolin. Është një Vit jubilar për të cilin Papa foli
më 28 qershorin e vitit të kaluar në bazilikën e Shën Palit jashë Mureve. “Apostulli
i Popujve, i impenjuar posaçërisht për të pëhapur Lajmin e Mirë në të katër anët e
botës - pati pohuar Papa me këtë rast – e shkriu tërë jetën për unitetin dhe harmoninë
ndërmjet gjithë të krishterëve”. E më pas Benedikti XVI uroi që Shën Pali të na prijë
e të na mbrojë në këtë kremtim që të kujton dymijë vjet krishtërim, duke na ndihmuar
të ecim përpara në kërkimin e përvujtë e të sinqertë të bashkimit të plotë të të gjitha
gjymtyrëve të Korpit mistik të Krishtit”. Hollësitë e programit të Vitit kushtuar
Shën Palit, mund t’i mësoni duke hapur kanalin përkatës të internetit, realizuar në
katër gjuhë: italisht, anglisht, frëngjisht e spanjisht – e jo më pak, edhe në faqen
tonë të internetit. Me rastin e Vitit jubilar, Shtëpia Botuese e Vatikanit ka përgatitur
një sërë vëllimesh të nevojshme për veprimtarët baritorë e edhe për besimtarët, për
meditimin e tyre personal si dhe për kremtimet. Ndërmjet tyre, vëllimi i Benedikti
XVI “Mendime për Palin”: meditime të vogla të shkëputura nga homelitë, mesazhet e
fjalimet e Papës kushtuar “Mendimeve shpirtërore” dhe ‘Mendimeve Mariane’. Viti
Paolin do të kremtohet edhe në trojet shqiptare, sidomos në dioqezën e Tiranë-Durrësit,
e cila ia ka kushtuar katedralen kryesore, atë të Kryeqytetit, pikërisht Shën
Palit Apostull. Shqipëria e shqiptarët kanë një lidhje të veçantë me Apostullin e
Popujve, pasi mendohet se janë ungjillëzuar pikërisht prej tij. Vetë Shën Pali, në
‘Letrën drejtuar Romakëve’ shkruan se e ka përhapur Ungjillin e Krishtit “nga Jeruzalemi
e përqark në Iliri” (Rom 15,19). Edhe në trojet shqiptare, Viti Paolin do
të fillojë më 28 qershor. Mesha kryesore do të jetë ajo që do të kremtohet në orën
11, në Kishën Katedrale kushtuar Apostullit, në Tiranë. Pikërisht katedralja e Tiranës
është caktuar nga Vatikani si kisha ku besimtarët shqiptarë mund të marrin ndjesën
e plotë gjatë Vitit Paolin. Kushtet për këtë, sipas Dekretit të Pendestarisë Apostolike,
janë rrëfimi, kungimi dhe lutja sipas ndjetit të Papës. Konferenca Ipeshkvnore
e Shqipërisë ka formuar një komision të posaçëm kombëtar për të organizuar disa veprimtari
gjatë vitit kushtuar Shën Palit.