Kardinali Bertone në Bjellorusi: dialogu ekumenik rruga për zgjidhjen e problemeve
të historisë me frymë vëllazërore
(20.06.2008 RV)Kardinali Tarçizio Bertone, sekretar i Shtetit të Vatikanit,
protagonist i shumë takimeve me Kishën dhe autoritetet bjelloruse. Dialogu ekumenik
është rrugë për të zgjidhur problemet e historisë me frym ë vëllazërore, ka theksuar
kardinali, i cili ndodhet në Bjellorusi që nga dita e mërkurë. Sot paradite, ai
mbajti një fjalim para ipeshkvijve dhe u takua me kreun e shtetit, Llukashenko. Më
pas mori pjesë në një drekë të shtruar për nder të tij nga ministri i jashtëm. “Barinj
të grigjës” në një vend dhe në një periudhë historike në të cilën nuk mungojnë vështirësitë,
e para e të gjithave ajo e numrit të vogël të meshtarëve, diakonëve dhe bashkëpunëtorëve
të tjerë kishtarë: kështu u foli kardinal Bertone ipeshkvijve bjellorusë, duke u çuar
inkurajimin e Papës Benedikti XVI. Duke i këshilluar të punojnë bashkarisht me meshtarët
e tyre, kardinali nguli këmbë në dialogun ekumenik pa paragjykime. Ai është mjeti
më i përshtatshëm për të zgjidhur problemet që katolikët kanë me ortodoksët në Bjellorusi,
theksoi sekretari i Shtetit të Vatikanit. Gjendja është e ndërlikuar edhe për shkak
se Kisha katolike po pret kthimin e pasurive të konfiskuara nga regjimi sovjetik,
në veçanti vendet e kultit. Dje pasdite, duke takuar bashkësinë greko-katolike, të
papranuar nga kisha ortodokse, e cila i konsideron pasuritë e saj si të vetat, prelati
i falenderoi për besnikërinë e tyre ndaj Papës dhe Selisë së Shenjtë. Përsa i
përket qeverisë bjelloruse, në takimin me autoritetet, kardinali Bertone theksoi se
Selia e Shenjtë ka për qëllim t’i propozojë Bjellorusisë jo vetëm bashkëpunim dypalësh,
por edhe në fushën ndërkombëtare në favor të paqes ndërmjet popujve dhe të përparimit
të vërtetë të njerëzimit.