Fillon në Vatikan seminari mbi “Politikën si formë ekzigjente e bamirësisë”: Në mikrofonin
tonë kardinali Renato Rafaele Martino.
(19.06.2008 RV)Fillon nesër në Vatikan një Seminar ndërkombëtar dy ditor, organizuar
nga Këshilli Papnor për Drejtësinë e Paqen, me temë: “Politika, formë ekzigjente e
bamirësisë”. Do të marrin pjesë rreth 60 ekspertë, ndër politologë dhe personalitete
të impenjuara në veprimtari shoqërore. Do të flitet për ideologji të forta e politika
të dobta, për vlerat që nuk mund të negociohen dhe pluralizmin, për laicitetin e bioteknologjitë.
Takimi do të përurohet nga kardinali Renato Rafaele Martino, kryetar i dikasterit
përkatës vatikanas. Në mikrofonin tonë, kardinali shpjegon se pse është zgjedhur kjo
temë: Kemi zgjedhur të përdorim shprehjen e mirënjohur me të cilën Papa Pali
VI pati përkufizuar politikën, për të nënvizuar, nga njëra anë, kuptimin e thellë
të ushtrimit të politikës si shërbim ndaj njeriut, protagonist i bashkëjetesës së
bazuar mbi miqësinë civile e vëllazërinë e, nga ana tjetër, vlerësimin dhe konsideratën
e Kishës për ata që ia kushtojnë jetën atij shërbimi, duke marrë përsipër peshën e
përgjegjësive që u takojnë. Në kohën e sotme, politika është në krizë. Kjo
duket edhe nga vlerësimet në shtyp për politikën e madje edhe Kisha nuk i ka kursyer
kritikat për politikanët… Në fakt, mund të themi se politikanët janë të parët
që e vuajnë këtë krizë të politikës, e cila e ka zanafillën, siç nënvizon Ati i Shenjtë,
në krizën e “arësyes politike”. Pra, në paaftësinë për ta parë si evidente të drejtën
natyrore e, për pasojë, faktin që ekziston një arësye e përbashkët për të gjithë njerëzit,
së paku në sistemet e mëdha themelore të vlerave. Që këtej, kërkesa, të cilën e ndjen
veçanërisht edhe Kisha, për të përsëritur ekzistencën e vlerave të panegociueshme,
pavarësisht nga pluralizmi kulturor që karakterizon kohët tona. Një argument
tjetër në program është ai i laicitetit… Sigurisht, çështja e laicitetit është
në bazë të çdo impenjimi shoqëroro-politik të të krishterit dhe e ka zanafillën në
parimin e autonomisë së sanksionuar nga e vetmja shpallje e qartë e, si të thuash,
“teorisë politike dhe shoqërore” shqiptuar nga Jezu Krishti për të zgjidhur problemin
e tributit të derdhur për Çezarin. Prandaj, kemi të bëjmë me gjetjen e raportit të
drejtë ndërmjet jetës fetare dhe botës, ndërmjet sferës fetare dhe sferës politike,
sipas asaj që ka shkruar Ati i Shenjtë në enciklikën “Deus Caritas est”. Duke folur
për marrëdhëniet ndërmjet Kishës e Shtetit, Papa flet për dy sfera të ndara, por gjithnjë
në marrëdhënie të ndërsjellta.