Sekretari i Shtetit të Selisë së Shenjtë për kardinal Kazarolin: “ishte negociator
i pajisur me aftësi të mëdha ndërmjetësimi”.
(10.06.2008 RV)U zhvillua sot në Romë kuvendi për të përkujtuar dhjetë vjetorin
e vdekjes së kardinalit Agostino Kazaroli, protagonistit të Ostpolitikës, e cila e
shoqëroi Kishën e Lindjes gjatë gjithë viteve të Luftës së Ftohtë në marrëdhëniet
me Vatikanin. Një diplomat i jashtëzakonshëm, i impenjuar në arritjen e paqes
e në sigurimin e kushteve që Kisha të zhvillonte misionin e saj në liri: kështu foli
sot në kuvend, Sekretari i Shtetit të Vatikanit, kardinali Tarçizio Bertone. Kujtojmë
se kardinali Kazaroli ka qenë edhe ai në krye të Sekretarisë së Shtetit nga viti 1975
deri në vitin 1990, por periudha e zbatimit të Ostpolitikës së Vatikanit është edhe
më e shtrirë, pasi ka filluar që nga viti 1963 për të përfunduar me rënien e Murit
të Berlinit, më 1989. Kardinal Bertone përshkroi krejt veprimtarinë diplomatike
të kardinal Kazarolit, duke kujtuar se në fazën e parë të Ostpolitikës, gjendja e
Kishës në vendet komuniste ishte e tmerrshme. Ipeshkvijtë e meshtarët arrestoheshin,
mbylleshin seminare, konfiskoheshin pasuritë e Kishës e zhvillohej një propagandë
kapilare ateiste, duke diskriminuar katolikët në çdo fushë të shoqërisë. Gjithashtu,
të gjitha vendet e Lindjes i ndërprenë marrëdhëniet diplomatike me Selinë e Shenjtë.
Ishte Papa Gjoni XXIII ai që i hapi rrugën dialogut, mes mijëra vështirësive, pasi
Atin e Shenjtë nuk e lejuan të kryente shtegtimin e tij apostolik në Poloni. Është
pikërisht në këtë situatë që kardinal Kazaroli tregon aftësitë e tij diplomatike: “Agostino
Kazaroli – tha sot kardinal Bertone – ishte negociator i Vatikanit i pajisur me aftësi
të mëdha ndërmjetësimi; njeri i dialogut, person në gjendje të lidhte kontakte, dëgjues
i durueshëm, në kërkim të palodhur të marrëveshjeve të mundshme”. Kujtojmë
se kardinal Kazaroli ishte edhe protagonist i padiskutueshëm i Konferencës së Helsinkit
e më pas shoqëroi Papën Gjon Pali II në takimin me Gorbaçovin e në të gjitha veprimet
deri në rënien e Murit të Berlinit.