Atentat i dyfishtë në Sri Lanka. Kryeipeshkvi i Kolombos: luftë absurde.
(06.06.2008 RV)Shkallëzohet dhuna
në Sri Lankë. Sot paradite një autobuz u hodh në erë në kryeqytetin Kolombo, duke
shkaktuar 22 të vdekur e 50 të plagosur. Një autobuz tjetër shpërtheu duke shkaktuar
vetëm të plagosur. Që nga fillimi i konfliktit në ishull, në vitin 1983, kanë gjetur
vdekjen 60 deri në 70 mijë vetë. Që nga 16 janari i këtij viti nuk respektohet më
armëpushimi ndërmjet qeverisë dhe rebelëve Tamil, i cili u nënshkrua në shkurtin e
2002-shit me ndërmjetësimin e Norvegjisë. Gjendja është rënduar që nga 2005-a, kur
është zgjedhur president Mahinda Razhapaksa, nacionalist që ka përdorur grushtin e
hekurt kundër guerriljes. Të dëgjojmë kryeipeshkvin e Kolombos, imzot Osvald Tomas
Kolman Gomis për qëndrimin e kishës së vendit: Ne e kemi thënë qartë se jemi
për një zgjidhje politike. Dhe kemi nënvizuar tri pika: së pari, se ky është një vend
i vetëm e nuk mund të ndahet. Së dyti, se çdo qytetar i këtij vendi duhet të ketë
të drejta të barabarta. Së treti, se zgjidhja e problemit të sotëm nuk është lufta,
por një zgjidhje politike e bazuar mbi drejtësinë dhe barazinë. Unë shpresoj që këto
propozime të merren seriozisht në konsideratë nga qeveria e Sri Lankës. Nga ana jonë,
i ftojmë të gjithë të luten për këtë vend, sepse çka është e pamundur për njeriun
është e mundur për Zotin. Kjo është thirrja ime e fundit.