Kremtime për Ditën botërore të ambientit: ‘Dekalogu’ i Selisë së Shenjtë për mbrojtjen
e Krijimit e të burimeve të tij. Intervistë me imzot Krepaldin.
(05.06.2008 RV) Doktrina shoqërore e Kishës i frymëzon dhe i nxit ndërgjegjet
e njerëzve t’i mbrojnë burimet e Krijimit, për të sotmen e për të ardhmen, duke respektuar
ritmet natyrore, me vëmendje solidare për tokat më të varfëra. E thekson këtë Këshilli
Papnor i Drejtësisë e Paqes, ndërsa bashkësia ndërkombëtare kremton Ditën botërore
të ambientit, themeluar nga OKB-ja. Qendra e kremtimeve të sivjetme është Zelanda,
ndërsa tema është “Jo vartësisë! Për një ekonomi me përqindje të ultë qymyri”. E kjo,
sepse ‘planeti ynë rrezikohet shumë pikërisht ngaqë është mësuar me qymyrin’. Alarmin
e jep sekretari i përgjithshëm i Kombeve të Bashkuara, Ban-Ki mun që në rreshtat e
para të komunikatës së tij për Ditën botërore të ambientit. Në se është e vërtetë
se qymyri e nafta – theksohet në komunikatë - i hapën udhën e industrializimit, Perëndimit
më parë, e sot, vendeve në rrugë zhvillimi, është po aq e pamohueshme se vartësia
jonë nga energjia e fituar prej qymyrit, ka rritur në mënyrë të ndjeshme gazet që
shkaktojnë ngrohjen e atmosferës e që njihen me emrin ‘gaze-serrë’. Shkatërrimet që
po shkaktojnë fenomenet e paparashikueshme të natyrës dhe ndryshimet klimaterike të
pallogaritshme, flasin për një situatë dramatike, së cilës i duhet shpallur luftë
globale, duke bërë të gjitha përpjekjet që Planeti të ketë sa më shpejt ‘një ardhmëri
pa qymyr’. Mbi temat e mbrojtjes së ambientit edhe Selia e Shenjtë ka treguar
gjithnjë vëmendje të madhe, siç e pohon ipeshkvi Xhampaolo Krepaldi, sekretar
i Këshillit të Drejtësisë e Paqes, në mikrofonin e Radios sonë:
Përgjigje:
- Duhet të shpreh, në radhë të parë, vlerësimin tim për nismën, për Ditën e për
temën e saj, që flet për një ekonomi të drejtë e solidare dhe për marrëdhëniet e sotme
ndërmjet vende të pasura e të varfëra. Është ide e mirë të pakësohet përqindja e karbonit,
por duhen shtuar gjëra të tjera, e jo vetëm energji alternative, siç thuhet sot.
Pyetje:
- Ç’mendoni për përdorimin e energjisë bërthamore?
Përgjigje: -
Përsa i përket energjisë bërthamore, qëndrimi i mësimeve shoqërore të Kishës është
krejt i qartë: dënohet përdorimi i energjisë bërthamore për qëllime ushtarake, por
jo për qëllime ekonomike, në ndihmë të shoqërisë. Thikë me dy teha (presa), kjo energji,
sepse shpesh thuhet që do të përdoret për qëllime civile, në sa pas kësaj fjale fshihen
pikërisht qëllimet ushtarake.
Pyetje: - Ju keni hartuar një ‘Dekalog’
për mbrojtjen e mjedisit. Cila është përmbajtja e tij?
Përgjigje: -
Kam vënë dhjetë pika, që përbëjnë kapitullin kushtuar ambientit, në Përmbledhjen e
Doktrinës shoqërore të Kishës. E bëra me qëllime edukative, formuese. Mendoj se, sidomos
bashkësitë, grupet e lëvizjet e krishtera, duhet t’i njohin këto dhjetë urdhërime
e, posaçërisht, mësimet tepër të pasura të Kishës mbi çështjen e mjedisit e të mbrojtjes
së tij.