Obama, kandidati për president i demokratëve në SHBA
(04.06.2008 RV)Pas primareve demokratike në Montana dhe në Dakotën e Jugut,
u përvijua tashmë përfundimisht kuadri i zgjedhjeve presidenciale të nëntorit në SHBA.
Republikani Xhon MekKein do të sfidohet nga demokrati Barak Obama. Senatori i Ilionisit
është afroamerikani i parë që hyn në garën për president, në një nga dy partitë e
mëdha të vendit. Hilari Klinton tërhiqet me një diferencë prej pak votash, por me
premtimin për ta shoqëruar Obamën në Shtëpinë e Bardhë, ndoshta me detyrën e zv.presidentes.
Por mund të jetë një figurë tepër e rëndësishme, pas një presidenti të sapozgjedhur
si Obama, prandaj nuk dihet nëse ai do ta ftojë në ndarjen e pushtetit. Amerika ka
kaluar tashmë një periudhë të gjatë me një zv.president si Dik Çenej, i cili praktikisht
ka qeverisur Shtëpinë e Bardhë në vend të Xhorxh Bushit. Nga ana tjetër, Hilari Klinton
si zv.presidente mund t’i shtyjë latinoamerikanët të votojnë për Obamën. Elektorati
i demokratëve është i ndarë përgjysëm e tradita kërkon që kur nuk janë dakord me kandidatin,
edhe pse i së njëjtës parti, njerëzit abstenojnë.