Kardinali Tauran: po hartohet një dokument i ri mbi vijat orientuese për dialogun
ndërfetar.
(04.06.2008 RV)Filloi sot paradite në Romë mbledhja plenare e Këshillit Papnor
për dialogun ndërfetar me temë “Dialogu në vërtetësi e në dashuri: orientime baritore”.
Gjatë punimeve do të flitet edhe për hartimin e një dokumenti të ri mbi vijat orientuese
të dialogut me fetë e tjera. Plenaren e hapi kryetari i dikasterit, kardinali Zhan
Lui Toran i cili theksoi se, si besimtarë, e dimë që Zoti është një i vetëm e se i
jep kuptimin e fundit jetës sonë e historisë së njerëzimit. Prandaj të gjithë jemi
të impenjuar të kërkojmë të vërtetën. Ta duam. Ta mbrojmë. Ta transmetojmë. Për
këtë arsye – vijoi Hirësia e Tij – ka ardhur koha që t’u jepen barinjve dhe besimtarëve
disa orientime të përgjithshme, që duhen pasur parasysh në situata të veçanta. Në
bazë të këtyre orientimeve do të jenë dhjetë urdhërimet e Tënzot, gramatikë universale,
të cilën të gjithë besimtarët mund ta përdorin në lidhjet e tyre me Hyjin e me të
afërmin.