Dita ndërkombëtare për fëmijët e pafajshëm, viktima agresioni
(04.06.2008 RV)4 qershori është
shpallur nga OKB-ja si “Dita ndërkombëtare për fëmijët e pafajshëm, viktima agresioni”.
Kjo ditë kremtohet në kuadrin e “Dhjetëvjeçarit ndërkombëtar për Paqen e për kundërshtimin
e dhunës ndaj fëmijëve në botë”, shpallur nga Asambleja e Përgjithshme e OKB-së për
periudhën 2001-2010. Në mikrofonin tonë prof. Xhovani Puljizi, kryetar i Komisionit
Kombëtar Italian UNESCO: Viktimat e para të dhunës e të luftës janë fëmijët.
Besoj se sot është e rëndësishme që Kombet e Bashkuara të tërheqin vemendjen ndaj
kësaj gjendjeje. Në këtë kuptim, mendoj se UNESCO ka të drejtë ta bashkojë temën e
kulturës për paqen me atë të zhvillimit të qëndrueshëm. Të gjitha konfliktet në nivelin
ndërkombëtar, por edhe në atë lokal, vijnë për arësye mbijetese, nga shfrytëzimi jo
i rregullt i burimeve natyrore. Zhvillimi duhet të mbajë parasysh se pasuritë e planetit
shërbejnë për krejt globin e jo për të ashtuquajturën botë perëndimore. Flukset e
mëdha emigruese të viteve të fundit, që zhvendosin breza të tërë nga një vend në tjetrin,
tregojnë se ka diçka që nuk funksionon në ekuilibrin botëror e në politikat e zhvillimit
të qëndrueshëm. Të punojmë për vendosjen e këtij ekuilbri do të thotë të punojmë për
paqen.