Kardinali Valter Kasper pas kthimit nga Rusia: filloi një fazë e re në marrëdhëniet
ndërmjet katolikëve e ortodoksëve rusë.
(02.06.2008 RV)Kardinali Valter Kasper, kryetar i Këshillit Papnor për nxitjen
e bashkimit të të krishterëve, ishte në Rusi më 21 deri më 30 maj, me ftesë të Hirësisë
së Tij, Kirill, metropolit i Smolenskut e i Kaliningradit, si dhe kryetar i departamentit
për marrëdhëniet e jashtme kishtare të Patriarkanës së Moskës. U takua edhe me
patrikun ortodoks Aleksei II, të cilit i dorëzoi një Letër të Benediktit XVI. Në
mesazh, Papa shpreh kënaqësinë për shenjat e vëllazërimit, që vërehen gjithnjë më
shumë në marrëdhëniet ndërmjet dy Kishave motra, të cilat kanë një dëshirë e një qëllim
të përbashkët: të mbështesin, në botë, vlerat e krishtera. Ja si shprehet kardinali
Kasper, në përfundim të kësaj vizite private:
Përgjigje: -
Nisi si vizitë private, por pastaj u bë vizitë gjysëmzyrtare. Unë pata si qëllim ta
njoh më mirë Rusinë, traditën e saj shpirtërore, fetare e teologjike, prandaj shtegtova
në disa krahina të vendit. Isha në Kazan për të nderuar përsësi ikonën e Zojës së
Kazanit. Isha, pastaj, në Novgorod, në manastirin ku jetoi një nga shenjtorët më të
nderuar, Serafini i Sarovit. U takova me studentët, sepse kjo për mua kishte shumë
rëndësi, dhe me disa ipeshkvij. Më pritën shumë më mirë sesa shpresoja: me zemër të
hapur e me ndjenja vëllazërore. Kjo më kënaqi e më tregoi se jemi në fillim të një
faze të re të marrëdhënieve tona me Kishën ortodokse ruse. Mendoj se edhe ata duan
t’i lënë mënjanë mosmarrëveshjet e së kaluarës, të cilat nuk janë sqaruar akoma, natyrisht.
E them këtë, sepse nuk dua të jem utopist. Por them edhe se ndjehet fuqimisht dëshira
për fillimin e një faze të re bashkëpunimi ndërmjet dy Kishave. E kjo është shumë
e rëndësishme. I rëndësishëm është edhe fakti që takmi me Aleksein II ishte pozitiv
e plot shpresa për të ardhmen. Patriku më dha një letër e një dhuratë për Atin e Shenjtë
dhe në fund, duke më folur gjermanisht, më tha se e do shumë Papën. Pikërisht kështu
u shpreh.