Reflektim i drejtorit tonë të përgjithshëm, Atë Federiko Lombardi ‘Kundër armëve’.

(01.06.2008 RV)Është bërë tashmë traditë që, çdo fundjave, drejtori ynë i përgjithshëm, Atë Federiko Lombardi, t’u propozojë atyre që ndjekin programet e RadioVatikanit dhe faqet e saj të internetit në 34 gjuhë të ndryshme të botës, një reflektim, që prek tema nga më të ndryshmet, parë gjithnjë me syrin e mësimeve të Papës e të Kishës katolike. Sot Atë Lombardi ngre zërin ‘Kundër armëve’:

“Kishte me u dashtë që armët të mos ekzistonin, edhe pse e dimë që armët mbrojtëse janë, në një fare mase, të nevojshme në këtë botë. Por është e drejtë të impenjohemi për të kufizuar sasinë e armëve, për të kufizuar përdorimin e tyre, për zhdukjen graduale të formave të armëve mbrojtëse, posaçërisht çnjerëzore. U prekëm kur Papa, në Gjenovë, pas takimit me të rinjtë në Engjëllin e Tënzot, duke qenë në rrethana që s’kanë të bëjnë fare me armët, e konsideroi si detyrë t’i drejtonte thirrjen e tij Konferencës ndërkombëtare për zhdukjen e municioneve copëtuese (bombat cluster), që hapej në Dublin. Ashtu siç është i denjë për vëmendje kontributi i përfaqësuesit të Vatikanit në konferencë. Kush i prodhon këto municione dhe i eksporton, shqetësohet vetëm për dëmin ekonomik që mund të shkaktojë zhdukja e tyre. Por a nuk i shkaktojnë një dëm shumë më të madh vendeve të goditura prej tyre e viktimave të tyre? Si mund të krahasohet humbja e fitimit ekonomik, që arrihet duke fabrikuar mjete të tilla, shkatrrimtare për vetë natyrën e tyre e të krijuara enkas për t’u shkaktuar sa më shumë dëme njerëzve, me çminimin, bonifikimin e, sidomos me dhimbjen e dëmin që pësojnë viktimat, familjet e tyre dhe bashkësia, në shumicën e rasteve krejt të pafajshëm?
Duket sheshit. Gjykimi që duhet dhënë është i qartë. Megjithatë duhet përsëritur! Pali VI u thoshte Kombeve të Bashkuara: “Nuk mund të duash me kobure në dorë!” dhe kujtonte se armatimet shkatërrojnë besimin reciprok dhe kërkojnë shpenzime të mëdha, duke penguar projektet e paqes e të solidaritetit. Jeta ndërkombëtare në paqe mund të bazohet vetëm mbi të drejtën e jo mbi forcën. Çdo hap i veçantë kundër prodhimit, tregtimit dhe përdorimit të armëve duhet mbështeur. Edhe përpjekja për të zhdukur minat kundër njeriut, edhe lufta kundër municioneve copëtuese”.