Ati i Shenjtë ipeshkvijve të Mianmarit: uroj që ndihmat ndërkombëtare të arrijnë faktikisht tek viktimat e ciklonit Nargis e të favorizohet edhe rindërtimi i vendit.

(30.05.2008 RV) Një urim që Kisha birmane të mos ketë frikë në të sotmen, as në të ardhmen, por t’i përballojë vështirësitë e persekutimet, duke mos e humbur kurrë besimin në Zotin e natyrisht, edhe në mbështetjen nga ana e të gjitha Kishave të tjera të botës. Kështu e përfundoi Benedikti XVI fjalimin drejtuar ipeshkvijve të Mianmarit, të cilët i priti sot në audiencë, në përfundim të vizitës së tyre ‘ad Limina’. Papa i kushtoi vëmendje të veçantë situatës në vendin e dëmtuar rëndë nga cikloni Nargis, duke u ndaluar sidomos tek vështirësitë për shpërndarjen e ndihmave. Shenjtëria e Tij i nxiti ipeshkvijtë t’i studiojnë mirë planet baritore për drejtimin e bashkësisë së vogël katolike vendase, në të cilën lulëzojnë thirrjet për rrugën meshtarake dhe të kenë marrëdhënie sa më të mira me budistët.