365 ditë me njerëz e ngjarje që ia ndryshuan faqen botës.
(28.05.2008 RV)28 maj: Mikelanxhelo pikturon tavanin e Kapelës Sikstine. Romë,
1513. “Ja, më në fund u krye. Tani mund të bëhem rishtas skulptor…” Mendon Mikelanxhelo,
ndërsa thadron me çekan një bllok të madh mermeri të bardhë. Pluhuri ngrihet përpjetë
si re e pastaj i bie ngadalë mbi flokë, si të ishte dëborë, duke i kujtuar sa ka ngrirë
pesë dimra me radhë, duke pikturuar tavanin e Kapelës Sikstine për papën zemrak, Julin
II. Mikelanxhelo vë buzën në gaz; një gaz i vrerosur: në këtë çast Juli II duhet
të jetë duke bekuar Kapelën, i rrethuar nga përcjellësit e nga këshilltarët e tij,
ndërsa ai, njeriu që e pikturoi, mungon! Jo, Papa nuk mund ta durojë praninë e tij.
Ndërsa ai nuk do ta harrojë kurrë trajtimin që iu bë, vetëm sepse nuk mund të pikturonte
aq shpejt, sa pritej prej tij. E të mendosh se kalonte shtatëmbëdhjetë orë në ditë
mbi një skelë të ngushtë, pa zbritur as një minut, për të mos humbur përqendrimin!
Juli II e kishte lejuar ta zgjidhte vetë temën biblike, që do të pikturonte mbi tavanin
e Kapelës e Mikelanxhelo vendosi të pikturojë librat e parë të Biblës: Krijimin e
botës, Zotin duke i dhuruar jetën Adamit e Evës, mëkatin e zanafillës, përmbytjen
universale e edhe profetët. E Juli II nuk u zhgënjye: “Biri im, jam shumë i kënaqur
prej teje” – i pati thënë. “Në se Hyji është kaq zemërbutë, sa e ke paraqitur ti,
jam i sigurtë se do të m’i falë të gjitha mëkatet”. Në fytyrën e artistit riduket
buzëqeshja e hidhur. E të mendosh se të gjithë vijojnë ta marrin nëpër gojë… Ai, që
e lexoi e e rilexoi pa mbarim Biblën, duke u zhytur në të ditë për ditë, për ta paraqitur
në pikturë përsosurinë e Hyjit e të krijimit të Parajsës së tij, është në qendër të
shkandullit, sepse të gjitha personazhet e pikturuara janë lakuriq. Po Mikelanxhelo
nuk deshi t’i shokojë kaq shumë shikuesit. Deshi vetëm të kremtojë bukurinë e krijimit,
duke pikturuar bukurinë e trupit. E për t’u kujtuar të gjithëve se njeriu u krijua
sipas shembëlltyrës së Hyjit, mendoi ta pikturojë edhe vetë Zotin fare të zhveshur.
Ndërsa për të shpjeguar se mëkati e përçudnon njeriun, në skenën e mëkatit të zanafillës,
paraqet trupa të shpërfytyruar, që e kanë humbur shkëlqimin e tyre të parë. Por
lakuriqësia është tabu, prandaj nuk do t’ia falin kurrë ata trupa të lakuriqtë. Disa
vjet më vonë, kur jetonte ditët e fundit, mori vesh, me hidhërim të papërshkrueshëm,
se mbi trupat e tij po pikturonin vela. Por kur Kapela Sikstine do të restaurohej
në shekullin XX, Gjon Pali II do ta bekonte e do të pranonte se ‘është shenjtërorja
e teologjisë së trupit njerëzor”.