Shqiptarët në Gjencan për të nderuar Zojën e Këshillit të Mirë
(26.05.2008 RV)E mbushur plot e
përplot me shqiptarë të ardhur nga e gjithë Italia, Kisha e Zojës së Këshillit të
Mirë në Gjenacan ishte e fundit që priti ipeshkvijtë e Shqipërisë, në përfundim të
vizitës së tyre “ad Limina Apostolorum” në Vatikan. Shtegtimi tradicional i shqiptarëve
te Zoja pra, këtë vit ishte i veçantë, sepse Mesha e Shenjtë u kremtua nga 5 ipeshkvij,
të kryesuar nga kryetari i Konferencës Ipeshkvnore, imzot Rrok Mirdita dhe nga shumë
meshtarë të tjerë të pranishëm. ---- Merrni pjesë në Sakramente – u tha imzot
Mirdita emigrantëve, duke u kujtuar se në Itali nuk mungojnë kishat. Pavarësisht se
të shpërndarë në të katërt anët e vendit, shqiptarët mund të bashkohen në një familje
të vetme, sepse nëse e jetojnë katolicizmin, ushqehen me të njëjtën Bukë, që është
Krishti. 5 të rinj morën Sakramentin e Krezmimit e të Kungimit të Parë, pas një
përgatitjeje të kryer nga murgesha shqiptare në Itali. Ja dy fjalë prej tyre:
Emigrantët
shqiptarë janë tashmë integruar mirë në territorin italian. Takimi i përvitshëm në
Gjenacan, në të dielën e fundit të muajit maj, është bërë një traditë, që përsëritet
çdo vit. Në ndryshim nga 15 vjet më parë, shqiptarët vijnë tani me makinat e tyre,
pa pasur nevojën e autobuzit, e vijnë edhe sëbashku me familjet, me fëmijët e lindur
në Itali, të cilët e mbushën kishën me zërat e tyre të gëzueshëm, shenjë e përmirësimit
të jetës së çdo emigranti. Por, për formimin e tyre shpirtëror mund të bëhet më shumë,
edhe nga ana e ipeshkvijve, siç na shpjegon don Paskuale Ferraro, Koordinatori pastoral
për shqiptarët në Itali:
Pas përfundimit
të Meshës Shenjte në Kishën e Zojës së Këshillit të Mirë në Gjenacan, emigrantët u
mblodhën sëbashku për të festuar në lulishten e vendit. Edhe pikniku e këngët e vallet
shqiptare janë bërë tashmë traditë, për kënaqësinë e banorëve, të cilët gjithnjë u
japin shqiptarëve mundësinë të lidhin në rrjet instrumentat muzikore e ndalen shpesh
për të biseduar me ta për Zojën e Shkodrës, që është edhe e Gjencanit. I kërkuam së
fundi, të përmbledhë emocionet e kësaj dite e të krejt vizitës “ad Limina” të ipeshkvijve,
pikërisht kryetarit të Konferencës Ipeshkvnore, imzot Rrok Mirdita: