Свяцейшы Айцец Бенедыкт XVI° напiсаў спецыяльную малiтву для кiтайскiх католiкаў,
якiя штодзень сутыкаюцца з судовымi пераследаваннямi ў камунiстычным Кiтаi. Афiцыйна
аб гэтым было аб’яўлена 16 траўня. Згодна з паведамленнем з Ватыкану, Папа прысвяцiў
малiтву кiтайскай Царкве, якая доўгiя гады прымушана знаходзiцца пад прыгнётам уладаў. Тэкст
малiтвы, якi будзе надрукаваны на кiтайскай i шасцi iншых мовах, звяртаецца па абарону
да Панны Марыi, прыпамiнаючы аб храме, якi пабудаваны ў Яе гонар у прыгарадзе Шанхая,
Шэшане. “Мацi Божая Шэшана, падтрымлiвай усiх, хто жыве ў Кiтаi, якiя ва ўмовах
штодзённых судовых працэсаў, працягваюць захоўваць сваю веру, спадзявацца i любiць.
Дазволь iм без боязi гаварыць аб Езусе ў свеце, i аб мiры з Езусам”, - гаворыцца ў
тэксте малiтвы. Трэба адзначыць, што ў гэтым годзе ўлады абмежавалi доступ да
згаданага касцёла, бо занепакоены магчымасцю масавых пiлiгрымак i народных хваляванняў
на рэлiгiйнай аснове. Камунiстычны Кiтай, якi афiцыйна прытрымлiваецца атэiзма
ў рэлiгiйнай палiтыцы, разарваў дыпламатычныя зносiны з Ватыканам яшчэ ў 1951 годзе,
i ад таго часу не падтрымлiваў iх. Адной з нагодаў да гэтага з’яўляецца тое, што назначэнне
бiскупаў Святым Пасадам нiбыта ёсць парушэннем суверэнiтэту Кiтая i ўмяшальнiцтвам
ва ўнутраную палiтыку краiны. Але трэба адзначыць, што Бенедыкту XVI° удалося наладзiць
больш цёплыя адносiны з афiцыйным Пекiнам, прызнакам чаго магчыма лiчыць выступленне
Фiларманiчнага аркестра Кiтая ў Ватыкане.