16 мая 2008 г., у дзень успаміну мучаніцкай смерці святога Андрэя Баболі, у касцёле
Узвышэння Святога Крыжа ў Янаве Палескім (сёння — горад Іванава, Брэсцкая вобл.) адбыліся
ўрачыстыя набажэнствы ў гонар святога беларускай зямлі, якія ўзначаліў Апостальскі
адміністратар Пінскай дыяцэзіі кардынал Казімір Свёнтэк. Урачыстасць таксама была
прымеркавана да 70-й гадавіны кананізацыі Андрэя Баболі, якая адбылася ў Рыме 17 красавіка
1938 г.
Святкаванне распачалося з малітвы каля крыжоў, якія стаяць на месцы
мучаніцкай смерці апекуна Пінскай дыяцэзіі. Наступным пунктам урачыстасці стала святая
Імша, якую цэлебраваў кардынал Казімір Свёнтэк разам з прысутнымі святарамі Пінскай
дыяцэзіі. Дапаможны біскуп Казімір Велікаселец прамовіў гамілію, прысвечаную жыццю
Андрэя Баболі, яго дзейнасці і пакутніцкай смерці, якую той прыняў ад казакаў, атрады
якіх пад кіраўніцтвам Яна Ліхога спусташалі ў той час палескія землі.
Пасля
ўрачыстай святой Імшы адбылася адарацыя Найсвяцейшага Сакрамэнту і ўшанаванне рэліквій
святога Андрэя Баболі, а таксама сустрэча кардынала Казіміра Свёнтка з мясцовымі міністрантамі.
Свята
ўпрыгожылі спевы музычнага гурта «Адраджэнне» Міждыяцэзіяльнай вышэйшай духоўнай семiнарыі
імя св. Тамаша Аквінскага ў Пінску. З нагоды ўспаміну вялікага заступніка Беларусі
ў касцёле Узвышэння Святога Крыжа ў Янаве была арганізавана фотавыстава, на якой былі
прадстаўлены здымкі са святкавання 350-й гадавіны мучаніцкай смерці святога, якое
адбывалася ў кастрычніку 2007 г. у касцёле Божага Цела ў Нясвіжы.
Ва ўрачыстасці
прынялі таксама ўдзел пілігрымы з Лагішына і Пінска, якія 15 мая вырушылі ў пешае
падарожжа, каб праз засупніцтва святога Андрэя Баболі, якога Бог праславіў вялікімі
цудамі, прасіць аб патрэбных ласках. Паводле Catholic.by