Olimpiada në Kinë mund të ndikojë për njohjen e të drejtave të njeriut, duke nisur
e drejta e komunikimit.
(13.05.2008 RV)Disa janë rrethanat
në të cilat, këto ditë, Kina ishte e do të jetë e pranishme në mendimet e Papës e
të Selisë së Shenjtë. Javën e kaluar ishte përmes koncertit në Sallën e Palit VI,
dhënë për nder të Benediktit XVI nga Orkestra Filarmonike e Kinës; javën e ardhshme
do të jetë përmes Ditës së parë të lutjes për Kinën. Një nga protagonistët e jetës
kishtare kineze është, pa dyshim, kardinali Çen Zhë-Qyn, kryeipeshkëv i Hong
Kongut, i cili foli dje në Torino, në Panairin ndërkombëtar të Librit. Duke pasur
parasysh Olimpiadën e ardhshme, Hirësia e Tij u shpreh kështu në mikrofonin e Radios
sonë:
Përgjigje: - Mendoj se Olimpiada është një gjë e rëndësishme;
përfaqëson një vlerë që nuk duhet ngatërruar me gjëra të tjera. Prandaj edhe Papa
ka uruar që të zhvillohet me sukses. Këto gara vëllazërore, këto takime të njerëzve
nga të katër anët e botës, janë me vlerë të madhe. Natyrisht duhet përfituar nga ky
rast, për të inkurajuar qeverinë e Pekinit ta rishikojë edhe mbrojtjen e të drejtave
të njeriut, duke nisur nga liria më e madhe që duhet të kenë mjetet e komunikimit,
ashtu siç premtoi, kur kërkoi që Olimpiada të zhvillohej në Kinë.
Pyetje:
-Benedikti XVI në fjalimin drejtuar Orkestrës kineze, u shpreh kështu“Sonte,
duke ju pritur ju, të dashur artistë kinezë, Papa pret simbolikisht mbarë popullin
tuaj, e sidomos bashkëqytetarët tuaj, që besojnë në Jezusin e kanë një lidhje të posaçme
me Pasardhësin e Shën Pjetrit”. Si u pritën këto fjalë në Kinë?
Përgjigje:
- Lexova në gazetën komuniste të Hong Kongut se fjalët e Papës janë cituar
besnikërisht. Domethënë se i kanë pranuar.