Katastrofë nga tërmeti në Kinë: mëse 12 mijë viktima
(13.05.2008 RV)Merr përmasat e një katastrofe gjendja pas tërmetit që goditi
provincën kineze të Sishuanit. Bilanci i fundit flet për 12 mijë viktima, por llogaritet
se së paku 18 mijë vetë ndodhen nën gërmadhat e shtëpive të shkatërruara, vetëm në
qytetin e Mianjangut. Është e qartë se numri i viktimave do të rritet. Koha e keqe
po ngadalëson arritjen e ndihmave në zonë. Pavarësisht nga rëndësia e madhe që i ka
dhënë, qeveria e Pekinit ka vendosur të reduktojë programin e kalimit të Flakës Olimpike
në Kinë, për të favorizuar përpjekjen në ndihmë të popullsisë së dëmtuar nga tërmeti.
Nga 900 nxënësit, që përfunduan poshtë gërmadhave të shkollës së tyre në Duzhijangjan,
vetëm 50 dolën të gjallë. Edhe sot, ka pasur lëkundje të tokës, më e forta prej të
cilave ka arritur në 6 gradë të shkallës Rihter. Ndërkaq, Kina falenderoi për
ofertat ndërkombëtare të ndihmës, të cilat i pranon, por saktësoi se nuk është akoma
koha për të lejuar hyrjen e skuadrave të huaja në zonat e tërmetit. “Në këtë moment
– shpjegoi përgjegjësi i Mbrojtjes Civile – transportet janë bllokuar e kalimi është
i pamundur edhe për tanët”. Por është ndihma afatgjatë ajo që nuk duhet të mungojë,
siç shpjegoi ipeshkvi i Hong-Kongut, kardinali Çen Zhë-Qyn, i cili ndodhet në Itali.
Kardinali u bëri thirrje për ndihmë popullsisë katolike, Karitasit dhe Kryqit të Kuq
Ndërkombëtar, por sqaroi edhe se vështirësitë më të mëdha do të hasen në rindërtimin
e zonës së goditur nga tërmeti, prandaj gjendja nuk duhet harruar e ndihmat duhet
të vazhdojnë në kohë. Ai siguroi lutjen e katolikëve të Hong-Kongut për popullsinë
e Sishuanit në Kinë.