Kisha pranë popullsisë së Mianmarit, të goditur nga cikloni Nargis
(12.05.2008 RV)Vazhdon gjendja e vështirë në Mianmar (ish-Birmani), pas kalimit
të ciklonit Nargis. Sot mbërriti avioni i parë amerikan me ndihma për popullsinë,
të cilat do të shpërndahen nga ushtria. Kjo e fundit kontrollon ndarjen e të gjitha
ndihmave që vijnë nga jashtë. Gjendja në vend nuk e pengoi juntën ushtarake të zhvillojë
të shtunën në pjesën e vendit të pagoditur nga cikloni, referendumin për Kushtetutën,
që i jep asaj fuqi të plota, duke e quajtur sot një sukses të jashtëzakonshëm. Ka
ndryshuar edhe bilanci i viktimave. Sipas Zyrës së OKB-së për koordinimin e ndihmave
humanitare numri i të vdekurve mund të ndryshojë nga 63.290 në 101.682, ndërsa 220
mijë vetë konsiderohen të zhdukur. Nesër mblidhen në Bruksel, ministrat e Bashkimit
Evropian për të diskutuar pikërisht mbi gjendjen në Mianmar dhe për të vendosur rritjen
e ndihmave për popullsinë e vendit. Sipas Programit Ushqimor Botëror, kanë nevojë
për ndihma rreth 1 milion e 500 mijë vetë, por deri tani ato mbulojnë vetëm 20% të
nevojave. Dje, një anije me ndihma u mbyt në lumin Irrauadi. Ndërkaq, ndodhet
në Mianmar legati apostolik i Papës Benedikti XVI i cili vizitoi sot zonat e dëmtuara
nga cikloni dhe i çoi popullsisë mesazhin e Atit të Shenjtë. Kryeipeshkvi Salvatore
Penakio ka kremtuar edhe një Meshë sëbashku me klerin vendas në kryeqytet. Kisha e
Mianmarit ka krijuar një Komision të posaçëm për t’i bërë ballë situatës. Nën drejtimin
e Kryedioqezës së Jangunit, ai po punon për të ndihmuar rreth 60 mijë familje me racione
javore ushqimesh e uji, me dezinfektimin e ujit të pijshëm, me shpërndarjen e materialeve
të nevojshme dhe ilaçeve në 8 zonat më të shkatërruara.