(12.05.2008 RV)Benedikti XVI priti sot një grup tjetër ipeshkvijsh hungarezë,
në përfundim të vizitës së tyre ‘ad Limina’, vizitë që filloi më 5 maj. Fjalimin përfundimtar
të vizitës, Papa ua drejtoi prelatëve të shtunën e kaluar. Afrohet kështu dita
kur në Vatikan do të arrijnë për vizitë ‘ad Limina, Prelatët e Konferencës Ipeshkvnore
katolike të Shqipërisë. Vizita do të fillojë më 19 e do të zgjasë deri më 25
maj. Është vizita e tyre e dytë ‘ad Limina’ pas diktaturës. Kujtojmë se prelatët e
Shqipërisë ishin në Romë për vizitën e parë ‘ad Limina Apostolorum’ më 2 deri më
4 shkurt të vitit 2001. Asokohe u takuan me Papën Gjon Pali II. Tani i pret Benedikti
XVI. Gjatë qëndrimit të tyre në Romë, ipeshkvijtë do të marrin pjesë në një takim,
organizuar nga Migrantes (Fondacion i Konferencës Episkopale Italiane). Takimi, me
temë: “Raport për objektivat e realizuara dhe programimin e veprimtarive të reja baritore
me emigrantët shqiptarë në Itali”, do të mbahet më 22 maj.Më pas, një festë emocionuese:
e gjithë Konferenca Ipeshkvnore katolike e Shqipërisë do të jetë e pranishme në Meshën
Shenjte, që do të kremtohet të dielën, më 25 maj, në orën 11. 00, në Shenjtëroren
e Zojës së Këshillit të Mirë në Gjenacan. Kështu festa e sivjetme, e cila sipas traditës
mbledh rreth figures së Pajtores të shqiptarëve qindra emigrantë nga të katër anët
e Italisë, do të ketë emocione të veçanta e hire të veçanta.