Liturgjia e Fjalës së Zotit e solemnitetit të Rrëshajve “A”. Zoti flet në gjuhën tënde!
(10.5.2008. RV)Dëgjues të nderuar
të Radio Vatikanit, ja përsëri në takimin tonë javor të së shtunës me Fjalën e Zotit
të së dielës. Kësaj here do të dëgjojmë dhe meditojmë së bashku leximet biblike të
liturgjisë së Fjalës Hyjnore të solemnitetit të Rrëshajve, festës së Ardhjes së Shpirtit
Shenjt Zot mbi Apostujt e mbledhur në Cenakull, në Jeruzalem. Që nga ajo ditë e nga
ajo ngjarje madhore, mund të pohojmë se historia e njerëzimi kanë një orientim të
ri, një hov të ri, një dritë të re, një horizont të pakufishëm drejt Amshimit. Pra,
kanë kaluar 50 ditë nga solemniteti i Pashkëve e sot, me Kishën në festë, kremtojmë
dhuratat që Jezu Krishti Zot i pati premtuar dhe dhuruar asaj, pra ne të gjithëve:
Shpirtin Ngushëllues që vjen nga Ati Qiellor, Shpirtin Shenjtërues Zot që na është
dhuruar në zemrat tona me sakramentin e Pagëzimit, në mënyrë që të mund të ecim, të
mund të veprojmë e të jetojmë në Dritën Hyjnore, të frymëzuar nga Shpirti Shenjt,
të cilin jemi të ftuar ta dëgjojmë e pasyrqojmë në jetë e në marrëdhëniet tona të
përditshme me të tjerët. Festa e Rrëshajve, ardhja e Shpirtit Shenjt mbi Apostujt
shënon ditëlindjen e Kishës dhe ditëlindjen e gjallërimit tonë si besimtarë e dëshmitarë
të Krishtit të Gjallë, Shpëtimtarit të njerëzimit. Pra, nga kjo ngjarje e Rrëshajve,
Shpirti Shenjt Zot banon në shpirtin tonë njerëzor, Zoti është bërë më i afërt me
ne, është më intim me ne, se sa ne jemi me veten tonë, thotë shën Agostini. Kështu,
festa e Rrëshajëve na siguron se Zoti nuk na braktis kurrë, por Ai është miku e shoku
i përjetshëm i udhës sonë në jetën tokësore drejt përjetësisë. Eshtë Shpirti Shenjt
Zot Ai që na jep kuptimin e ri të misterit të Jezusit. Pa Të është e pamundur të depërtojmë
në këtë mister të Krishtit. Eshtë Shpriti Shenjt Ai që na bën të aftë t’i lexojmë
ngjarjet në dritën e fesë, në fenë e Krishtit që është dhuratë e tij Me kremtimin
e solemnitetit të festës së Rrëshajëve, Kisha e mbyll ciklin e Pashkëve për të vijuar
me kohën e zakonshme liturgjike gjatë vitit. Porsi pema që, pas stinës së lulëzimit,
më në fund sjell frytet e veta në mënyrë që të gjithë të mund t'i shijojnë, po kështu
është edhe për Kohën e Pashkëve që mbyllet duke na dhuruar Shpirtin Shenjt. Duke iu
dëftuar nxënësve të vet të mbyllur në Cenakull, Jezusi u dhuron atyre Shpirtin; në
dyzet ditët që pasojnë Ngjalljen e Krishtit, mësuesi hyjnor flet gjithmonë për Shpirtin
të cilin e pati premtuar qysh para mundimeve e kryqëzimit. Sot Shpirti vjen në
plotësi e menjëherë fillon misionin e tij, duke e vendosur Kishën në horizontin e
botës, e duke bashkuar ngadalë por vazhdimisht zemrat e çdo populli e të çdo kombi
në familjen e vetme të nxënësve të Jezusit, në përqafimin e vetëm të Zotit që është
Ati, Biri e Shpirti Shenjt. Atë ditë të Rrëshajve për botën fillon një flakë dashurie,
faljeje e hiri ( bekimi) që askush nuk do të mund ta shuajë kurrë. Sonte është
nata e festës së Rrëshajve. Me këtë solemnitet mbyllet periudha e kohës së Pashkëve
që filluam para 50 ditësh. Kisha i jep rëndësi të jashtëzakonshme kësaj feste e të
kremteje, aq sa ta konsiderojë ndër më të rëndësishmet pas Pashkëve. Po pse e gjithë
kjo rëndësi? Përgjigjen e gjejmë në leximet biblike të kësaj së diele, duke filluar
nga leximi i parë nga Vepra e Apostujve, që thotë se nxënësit gjendeshin së bashku
në të njëjtin vend, në Jerusalem. Në Ungjillin e Gjonit thuhet se menjëherë pas vdekjes
e ngjalljes së Jezusit, nxënësit rrinin me dyer të mbyllura, nga "frika prej Judenjve".
Pse kishin frikë? Me çdo gjasë, kishin frikë se do të trajtoheshin porsi Mësuesi i
tyre. Jezusi, që pati predikuar dashurinë e faljen, nuk ishte i mirëpritur nga të
gjithë për shkak të predikimit të tij: për shumë kënd mendimi e predikimi i Jezusit
ishte shkandullues, sepse i detyronte të ndryshonin e përmirësonin jetën. Për këte
arsye e vranë. Kush ka studiuar historinë e Romës e di mirë se nxënësit kishin të
drejtë të frikësoheshin: sepse në të vërtetë të gjithë qenë persekutuar e u bënë martirë
të kryqëzuar, me koka të prera apo të copëtuara nga luanët e Koloseut. Mirëpo kjo
ndodhi më vonë. Po ne të bëjmë një hap mbrapa, menjëherë pas ngjalljes së Jezusit.
Gjoni, që ishte i pranishëm në skenën e ngjarjes, tregon se "ditën e parë pas të shtunës…vjen
Jezusi, ndalet në mesin e tyre e thotë "Paqja me ju"". Këndej bëri një gjest simbolik:
"fryu mbi ta e u tha"merreni Shpirtin Shenjt". Në këtë mënyrë Jezusi e mbajti premtimin
që u pati dhënë para se të vdiste: ai në të vërtetë u pati thënë nxënësve të vet se
do të kishte qenë me ta përgjithmonë e se do t'u kishte dërguar Shpirtin e vet. Kjo
dhuratë e parë e Shpirtit ndodhi në formë private, në një dialog mes Jezusit e nxënësve.
Ndërsa ditën e Rrëshajve Shpirti Shenjt paraqitet në mënyrë spektakolare: "Vjen papritmas
nga qielli një krismë, porsi era që përplaset fuqishëm, dhe e mbushi tërë shtëpinë
ku gjendeshin”.
Solemniteti i Rrëshajve nuk është thjesht kremtim
apo kujtim. Është realitet, përvojë, që e jetojmë çdo vit. Shën Agostini i dallonte
festat e krishtera që përkujtojnë përvjetore, nga ato që kremtojnë një mister. Ato
që përkujtojnë përvjetore, kremtojnë rikthimin në kujtesë të ditës kur ka ndodhur
një ngjarje. Ndërsa festat që kremtojnë ‘misterin’, ndërmjet të cilave Shenjti numëronte
në radhë të parë Pashkët, jo vetëm që e kujtojnë ngjarjen, por sidomos, e rijetojnë
atë. Prandaj gjëja më e rëndësishme në solemnitetin e Rrëshajve duhet të jetë që
secili prej nesh të hyjë brenda misterit e të presë, me fe të gjallë që, çka ndodhi
atë ditë, të ndodhë përsëri në jetën tonë personale e në realitetin tonë konkret e
të përditshëm. Tani t'i dëgjojmë leximet biblike të këtij solemniteti e pastaj
komentin….