Papa në fillim të muajit të Marisë: Me Rruzare Krishti vendosen në qendër të jetës
sonë
(06.05.2008 RV)Sipas traditës së lashtë popullore, muaji i majit i kushtohet
Marisë. Benedikti XVI ia beson Asaj nevojat e Kishës e të mbarë botës. Maria – pohon
Papa – është Nënë e Mësuese për të krishterët e të gjitha kohërave. E, të shtunën
e kaluar, në përfundim të Lutjes mariane, që e kryesoi në bazilikën romake të Shën
Marisë së Madhe, Benedikti XVI u shpreh kështu: “Rruzarja Shenjte nuk është praktikë
e lidhur me të kaluarën. Lidhet me të gjitha kohërat e sjell paqe e pajtim”. Një
numër i madh besimtarësh u mblodhën rreth Atit të Shenjtë në të shtunën e parë të
muajit që, sipas traditës, i kushtohet Virgjërës Mari. Në hyrje të Kishës Atin
e Shenjtë e priti ikona e Shën Mërisë ‘Shpëtimi i popullit romak’ e Benedikti XVI
e nderoi në heshtje, para se të fillonte Rruzaren, kushtuar pikërisht Nënës së Krishtit,
shoqëruar me Misteret e Galdimit, që përshkojnë etapat kryesore të jetës së Krishtit:
nga Lajmërimi i Zojës së Bekuar, te episodi i Jezusit në Tempull, ndenjur ndërmjet
doktorëve, duke i pyetur e duke u dhënë përgjigje. Kujtojmë se në mbrëmjen e
31 majit, Papa do të jetë në Sheshin e Shën Pjetrit për kremtimet përfundimtare të
muajit marian. Një muaj kushtuar Zojës! Na lind vetvetiu pyetja: “Ç’i shtyu të
krishterët t’ia kushtojnë Nënës së Jezusit muajin e majit? Ia kërkuam përgjigjen kardinalit
Pol Pupar, kryetar nderi i Këshillit Papnor për Kulturën:
Përgjigje:
- Ishte një kërkesë e popullit të krishterë, që nisi shumë kohë më parë. Më kujtohet
sesi kur isha fëmijë, ne, me nënën, motrën e gjithë të tjerët, shkonim për ta stolisur
me lule Zojën e Bekuar e për t’i paraqitur Nënës së Krishtit lulet më të bukura, që
janë lutjet.
Pyetje: - Ç’ rol ka Maria në historinë e shëlbimit? Ç’
thotë për këtë doktrina katolike?
Përgjigje: - Thotë gjënë e mrekullueshme,
që e pohojmë në Besojmë: Jezusi, Shëlbuesi e Biri i Hyjit, lindi nga Zoja e Bekuar
për shëlbimin tonë. Në shekujt e parë të Kishës pati diskutime të vazhdueshme, pas
të cilave Koncili i Efezit e quajti ‘Theotokos’, Nënë e Zotit. E unë prekem ende thellë
kur shtegtoj nëpër Evropë, e posaçërisht në Moskë, e shikoj këtë mbishkrim: “Maria,
Nëna e Hyjit”. Atëherë theksoj që gjëja kryesore është se nuk mund ta ndajmë dot Birin
nga Nëna. E pikërisht me këtë bindje feje, Maria u quajt Zojë e Papërlyer, sepse nuk
mund të kishte asnjë njollë mëkati. Më pas, edhe e Ngjitur në qiell, dogma e fundit
e shpallur nga Piu XII - që pohon se Maria u ngjit në qiell me korp e me shpirt. Pse?
Sepse nuk mund të mbetej e ndarë nga qielli.
Pyetje: - Devocioni për
Zojën e Bekuar është shumë i përhapur në mbarë botën, por mund të ndodhë që të mos
përkojë me fenë e jetuar çdo ditë, në çdo rrethanë. Si mund ta jetojmë këtë përshpirtëri
me fe të vërtetë?
Përgjigje: - Edhe Koncili II i Vatikanit, në Kushtetutën
baritore ‘Gaudium et Spes’, thekson me ngulm se është e nevojshme të kapërcehet
hendeku ndërmjet besimit e praktimit të tij në jetë. Kemi shumë nevojë ta ushqejmë
fenë, që devocioni të jetë përherë i vërtetë e Maria të mbetet gjithnjë Nëna që na
çon te Biri, te Jezusi.
Pyetje: - Hirësi, a mund t’ju bëjmë edhe një
pyetje personale? Si i luteni ju Zojës së Bekuar?
Përgjigje: - I lutem
Marisë si i lutet fëmija nënës së vet të dashur. Jam mësuar t’i lutem kështu që kur
isha fëmijë, në prehër të nënës, e është ajo që ma ka mësuar ‘FalemiMërinë’, të cilën
e them gjithnjë para se të fle, sepse përndryshe nuk më zë gjumi. Kjo është lutja
ime më e dashur. Pastaj kujtoj misteret e Rruzares, njëkohësisht të thjeshta e të
thella, Mistere të Marisë, të Krishtit, të vetë jetës sonë.