Kisha njeh dukjet mariane në Los, mbi Alpet franceze. Imzot Falko: mesazh mëshire
e pajtimi për mbarë botën.
(05.05.2008 RV)Mijëra shtegtarë morën pjesë dje në Shenjtëroren e Zojës së
Los, mbi Alpet franceze, në ceremoninë solemne, gjatë së cilës ipeshkvi i Gap e Ambrë,
imzot Zhâ Mishel Falkò-Leandrí, shpalli njohjen zyrtare të dukjeve mariane para bareshës
franceze Benuat Rankyrrel në këtë vend, ndërmjet viteve 1600 e 1700. 146 vjet pas
njohjes së dukjeve të Lurdës, dje Kisha njohu vërtetësinë e fakteve të mbinatyrshme
që ndodhën në këtë vend të humbur ndërmjet Alpeve franceze, duke filluar nga maji
i largët i vitit 1664. Atë maj baresha Benuat Rankyrrel, që sapo i kishte mbushur
16 vjeç, në sa kulloste grigjën, pa për herë të parë Zojën e Bekuar, që mbante për
dore një fëmijë jashtëzakonisht të bukur. Vajza nuk dinte as shkrim as këndim e, megjithatë,
pikërisht asaj Zoja i besoi një mesazh të rëndësishëm, kur Evropa tronditej thellë
nga të ashtuquajturat luftëra fetare: ishte ftesë për kthimin e mëkatnorëve e për
pajtim. Zoja vijoi t’i dukej bareshës për 54 vjet rresht, deri në vitin 1718, kur
vdiq. Periudhë e gjatë, në të cilën vegimtares iu desh të përballonte shumë trazime:
nga tundimet e djallit, tek refuzimi nga ana e priftërinjve zhansenistë për t’i dhënë
Kungimin Shenjt e deri tek detyrimi për t’u larguar nga vendlindja ku, kur u rikthye,
gjeti gjithçka gërmadhë. Në vitin 1673, në sa lutej, iu duk vetë Jezusi i gozhduar
në kryq e i mbuluar me gjak: që atëherë Benuat filloi të ndjejë dhimbjet e mundimeve
të Krishtit. Nisin të vrapojnë tek ajo të sëmurë e nevojtarë. Të gjithëve u thotë
një fjalë të mirë; shëron shumkënd e shumkënd e kthen në rrugën e Zotit. Të gjitha
ngjarje të pashpjegueshme. Zhan Gitò do të thoshte: “Kjo Shenjtërore mbi Alpet është
një nga thesaret më të fshehta e më të fuqishme në historinë e Evropës”. Janë këto
fakte që e shtynë imzot Zha-Mishel di Falkò-Leandrí të vijojë përpjekjet për
arritjen e kësaj njohjeje zyrtare. Ta dëgjojmë:
Përgjigje: -Ajo
që më inkurajoi për të ecur në këtë rrugë, ishte pikërisht mesazhi drejtuar Benuat
Rankyrrel. Është mesazh tepër aktual, sepse thirrje për pajtim. Është, pra, mesazh
i mëshirës e i pajtimit. Besoj se jetojmë në një epokë, në të cilën mund të kontribuohet
akoma për realizmin e pajtimit, në të cilën është akoma e mundur të pajtohemi me të
tjerët, për t’u pajtuar me vetveten. Por vetëm përmes pajtimit me Hyjin, mund të pajtohemi,
pastaj, me të tjerët e me vetveten. Paqja e shpirtit mund të arrihet vetëm duke kaluar
nëpër këto tri etapa.