Papa pret delegatët islamikë e katolikë, pjesëmarrës në një takim kushtuar fesë e
arsyes.
(30.04.2008 RV)Në përfundim të audiencës së përgjithshme në Sheshin e Shën
Pjetrit, Papa priti në Sallën e Palit VI disa delegatë iranianë të Organizatës islamike
për kulturën dhe marrëdhëniet ndërfetare, që morën pjesë në bashkëbisedimin me Këshillin
Papnor për dialogun ndërfetar, me temë “Feja e arsyeja në besimin e krishterë e atë
islam”, që u mbajt këto ditë në Romë. Në përfundim të bashkëbisedimit, pjesëmarrësit
botuan një komunikatë, në të cilën shprehin mendimin e përbashkët se feja e arsyeja
janë dhurata, që Hyji ia ka bërë njerëzimit e se nuk mund të përdoren për të përligjur
dhunën. Të dyja palët mendojnë se duhen promovuar përshpirtëria e vërtetë, vlerat
morale dhe respekti për simbolet e të gjitha feve, duke dënuar haptazi çdo përpjekje
për talljen me besimet fetare. Gjatë audiencës me delegatët, Papa shprehu kënaqësinë
e tij të thellë për zgjedhjen e temës së bashkëbisedimit. Kujtojmë edhe se bashkëbisedimi
i ardhshëm do të mbahet pas dy vjetësh në Teheran.