Pas rënies së komunizmit, Kisha e Kaukazit duhet ta mbrojë identitetin e saj – i porosit
Papa ipeshkvijtë e zonës, në vizitë ‘ad Limina’.
(24.04.2008 RV)“Pas rënies së komunizmit,
është e nevojshme të dëshmohet me guxim Ungjilli, përballë sfidave të reja shoqërore
e kulturore”: këtë nënvizoi Benedikti XVI në fjalimin drejtuar ipeshkvijve të Kaukazit,
në Vatikan për vizitë “ad Limina”. Papa i ftoi besimtarët e Armenisë, të Azerbajxhanit
e të Gjeorgjisë ta mbrojnë familjen, t’i ndihmojnë nevojtarët, të dialogojnë vëllazërisht
me ortodoksët dhe me besimtarët e feve të tjera. Ati i Shenjtë kujtoi vizitën e
kohëve të fundit të kardinalit Bertone në këto troje dhe nënvizoi se zona kaukazike
është tokë e pasur me histori e, sidomos, vatër kulturash e udhëkryq ndërmjet Lindjes
e Perëndimit. Ngjarjet e trazuara të shekullit të kaluar në këto troje - vijoi Ati
i Shenjtë - nuk mundën ta shuajnë flakën e Ungjillit, ndonëse shumë e paguan me
jetë besnikërinë ndaj Krishtit e Kishës së Tij, duke shtuar radhët e martirëve. Benedikti
XVI nuk harroi as vështirësitë aktuale, që të kujtojnë jo vetëm Kaukazin, por edhe
vende të tjera ish-komuniste: “Pas rënies së Bashkimit Sovjetik – kujtoi
Papa - popullsitë tuaja hynë në rrugën e ndryshimeve shoqërore, që synojnë progresin.
Por situata mbetet ende e vështirë: shumë janë të varfër, të papunë e refugjatë, që
luftërat i larguan nga shtëpitë e tyre, duke i lënë në mëshirën e fatit”. Në
një situatë të tillë, Papa i porositi ipeshkvijtë të jenë prijës të urtë të popullit
të Hyjit e të bashkëpunojnë me Kishat e tjera e me ndjekësit e feve të tjera, për
sigurimin e një ardhmërie më të mirë shpirtërore e materiale në të gjithë zonën. Në
përfundim, i porositi besimtarët ta dëshmojnë me jetë dashurinë e Krishtit, pa qëllime
të tjera – e ipeshkvijtë, ta edukojnë grigjën e vogël, që u është besuar, me etikën
ungjillore.