Mirënjohje për albanologun Át Jak Marlekaj, ndër themeluesit e bibliotekës françeskane
në Shkodër.
(23.04.2008 RV)Me veprën "Pjetër Bogdani e Shqipnia e kohës së tij" ai na jep
fakte të reja mbi humanistin e madh, nxjerrë nga arkivi që Propaganda Fide e Romës
mbante për Bogdanin Edhe një libër në gjuhën shqipe për jetën dhe personalitetin
e Pjetër Bogdanit, i shtohet mozaikut të studimeve albanologjike të autorëve të shkrimeve
të para shqipe. Është vepra monumentale e Prof. Dr. Át Jak Marlekaj, ofm, "Pjetër
Bogdani e l'Albania del suo tempo" (Pjetër Bogdani e Shqipnia e kohës së tij), (1989),
e përkthyer për herë të parë në shqip nga studiuesi i njohur Willy Kamsi, icili ka
përgatitur dhe jetëshkrimin e autorit. Sapo është hedhur në qarkullim nga Botimet
Françeskane, në serinë e kolanës "Biblioteka Françeskane Át Gjergj Fishta, Kolana
e Shkrimtarëve Françeskanë", kolanë që ka arritur tashmë në botimin e më shumë se
27 librave dhe pritet që në të ardhmen të botojë më shumë se 100 tituj. Është ky një
kontribut që françeskanët duan t'i japin atdheut të tyre, duke nxjerrë në dritë vepra
të panjohura për studiuesin dhe lexuesin shqiptar. Me jetën dhe personalitetin
e Pjetër Bogdanit janë marrë shumë studiues të letrave shqipe. Nga ata që i kanë paraprirë
studimit të At Marlekajt për teologun dhe filozofin e shekullit XVI mund të përmendim:
Át Shtjefën Gjeçovin, Át Mark Harapin, Dom Ndre Mjedën, Dr. Rudolf Trofenikun, Ibrahim
Rugovën, Át Justin Rrotën, Mateo Sciambra-n, Gustav Weigand-in, Injac Zamputin etj.
Të flasësh për figurën poliedrike të Át Jakut, nuk do të ishte i mjaftueshëm ky
shkrim për studimet që ai ka lënë në fushën e albanologjisë. Disa nga këto vepra,
janë të botuara në gjuhë të huaj, kryesisht italisht, e të tjerat presin dritën e
botimit. Me dëshirën për kërkime shkencore, me vetëdijen se i përkiste një tradite
të ndritur burrash françeskanë që iu kushtuan atdheut për të mirën shpirtërore dhe
për zhvillimin kulturor të tij, ai na përçoi këtë traditë duke lënë me qindra e mijëra
faqe të ndritura të historisë tonë. Botimi në shqip i veprës "Pjeter Bogdani dhe
Shqipnia e kohës së tij", do të sjellë para lexuesit të dhëna të reja për personalitetin
e Bogdanit shkrimtar, humanist dhe prelat. Po ashtu edhe për familjen e tij dhe për
kohën ku ka jetuar. Është një periudhë e vështirë ajo e Pjetër Bogdanit, kur Shqipëria
ishte nën përdhunën e Perandorisë Osmane. E gjatë këtij pushtimi, katolikët dhe prelatët
e tyre, ndër ta, edhe Pjetër Bogdani vuajtën në mënyrë të veçantë. Vepra në fjalë
është një studim i mirëfilltë, që përfshin harkun kohor të historisë së Arbërisë,
përballë problemeve të vetë ekzistencës. Historia e shkruar në dekadat e fundit
të shekullit XX, shumë herë nuk e ka paraqitur realitetin e asaj kohe, ashtu siç ishte.
Ja pra, pse libri i P. Jakut, do të hedhë dritë mbi këtë periudhë të historisë shqiptare,
që padyshim mbart në vetvete shumë pyetje pa përgjigje e nyje të pazgjidhura. Librin
e pasuron një mori dokumentesh faksimile, të nxjerra prej Arkivit të "Propaganda Fide",
që ia shtojnë vlerën dhe interesin për ta lexuar. Kujtojmë për lexuesin se Prof. Dr.
Át Jak Marlekaj, në vazhdën e studimeve të asaj epoke ka mbledhur shumë dokumente
burimore historike, për studimin dhe hulumtimin e dy shekujve XVI – XVII. Profesori
i nderuar e shkruajti këtë libër me përkushtim të thellë, me seriozitet shkencor duke
hulumtuar dhe studiuar tekste të botuara dhe të pabotuara si dhe të gjithë arkivin
që Propaganda Fide e Romës mbante për Bogdanin: "Me rindërtue ndeshtrashat e jetës
së tij plot travajë e fisnike ka lypë nji punë të gjatë e me durim, nji kërkim t'imët
dokumentash të vjetër, nji rishqyrtim të teksteve e të interpretimeve kritike, simbas
nji fryme shkencore të ndërgjegjshme", - shkruan Át Jaku në parathënien e librit. Mbas
këtij botimi do të kemi botime të tjera të këtij autori që iu përkasin fushave gjuhësore
dhe historike. Kemi në përgatitje e sipër një vepër të rëndësishme për periudhën e
shkrimeve të para, veprën e Pjeter Budit "Speculum Confessionis –Pasëqyra e t'Rëfyemit",
vepër e transkriptuar në shqip me alfabetin e sotëm. Ky dorëshkrim gjendet pranë bibliotekës
françeskane "Át Gjergj Fishta" në Shkodër. Jo vetëm kaq, Arkivi në Shkodër i këtij
studiuesi të madh, përmban shkrime që duan kohë e mund për t'i botuar. Jeta e
tij e gjatë dhe pasioni për studimet shqiptare, e bënë At Jakun t'i hynte me zell
e me dashuri studimit për pasurimin e kulturës shqiptare. Sidomos për studimin e autorëve
të shkrimeve të vjetra të letërsisë dhe gjuhësisë shqiptare e inkurajuan miqtë e tij,
në veçanti Ernest Koliqi. Po paraqesim këtu edhe një letër që shkrimtari dhe gjuhëtari
i njohur, Martin Camaj, i dërgon Dr. Jak Marlekajt mbasi kishte marrë veprën e botuar
prej këtij të fundit, duke e quajtur "vepër monumentale" dhe të rëndësishme për të
dhënat e reja që ka sjellë për studimet historike dhe gjuhësore të asaj epoke. "München
17. 1. 1990 Prof. Dr. P. Giacomo Marlekajt I dashtun Pater, Mora veprën tuej
monumentale! Ju falenderoj me gjithë zemër. Në këtë semester mbaj kursin kryesor mbi
veprën e Bogdanit dhe vetjen e tij, shkrimtar, humanist e Prelat. Në orët e fundit
u thashë studentave tue paraqitë veprën tuej se duhet t'ia fillojmë punës prej fillimit
sepse këtu kemi aspekte të reja. Ndërkohë po përgatis edhe dy recensione, 1) për SÜDOST-FORSCHUNGEN,
revistë që shkon kudo në botë, dhe 2) për Buletinin Katolik që del në S. Francisco. Sot
nuk po e çoj gjatë: ju uroj shëndet e përgëzohem bashkë më ju për nji punë që ju kushtue
punë e mund. I jueji, Martin Camaj" Gjatë kohës si Profesor në Katedrat
e Universiteteve të ndryshme si Milano, Bolonjë dhe Bari, At Jaku krijoi kontakte
me figura të kulturës shqiptare në mërgim, siç ishin Karl Gurakuqi, Ernest Koliqi,
Martin Camaj, Át Daniel Gjeçaj ofm, Át Paulin Margjokaj ofm, Mustafa Kruja, etj dhe
me albanologë të huaj si Angelo Leotti, Vittore Pissani, Gino Bottiglione, Max Lambertz,
etj. Në arkivin personal gjenden shumë letra, korrespondencë me vlerë me këto personalitete. Së
fundi dua ta përmbyll këtë përshkrim me fjalët që vetë At Jak Marlekaj i ka thënë
në parathënien e librit: "Puna që po parashtrohet këtu, e burueme prej nji gjashmërie
ndjenjash e qëllimesh, don pra të jetë kontributi që një zemër shqiptare, e lidhun
thellësisht me atdheun e vet e me njerzit e vet bujarë e të panënshtruem, e ka ndie
se duhej ta jepte për njohjen e njenës ndër faqet ma fisnike e pak të njoftuna të
historisë kulturore të tokës së vet ku ka le." Jetëshkrim Át Jak Marlekaj
lindi në Plan, fshat i Dukagjinit më 19 nëntor 1906. Mësimet e para i mori nga albanologu
At Justin Rrota. Më 1917-1924 qe nxënës në Kolegjin Françeskan. Gjimnazin e kreu në
Shkodër pranë liceut "Illyricum" kurse studimet teologjike në Areco, Itali. Më 1931
merr Urdhrin e meshtarisë dhe deri në vitin 1937 jep mesim në "Illyricum" gjuhë dhe
letërsi. Është kryeredaktor i revistës "Zani i Shna Ndout" më 1932 dhe bashkëpunon
me "Hyllin e Dritës" që drejtohej nga At Gjergj Fishta dhe At Anton Harapi. Boton
përkthimin shqip të veprës "Zêmra n'udhtim" të shkrimtarit Milly Dandolo. Deri më
1941 kryen studime për Gjuhë dhe Letërsi moderne, në Universitetin e Bolonjës, ku
mbron shkëlqyeshëm laurën "La grafica albanese attraverso scrittori del periodo 1462-1908"
dhe merr titullin "Doktor" në letërsi. Më 1942, Át Jaku, ose ndryshe Prof. Dr. Luigj
Marlekaj, boton "Appunti del Corso di Lingua Albanese" dhe një vit më pas shkrimin
"Per lo studio delle palatali albanesi". Para nji komisioni të posaçëm të arsimit
shtetëror italian, fiton më 1955 të drejtën për të mbajtur ligjerata për gjuhën shqipe
në të gjitha universitetet e Italisë, dhe i mban në Milano, Bolonjë dhe Bari. Përfundon
studimin bibliografik "Indice Generale della Rivista Indo – Greco – Italica, Anno
1917-1933"; paraqet studimin "Giuseppe Schirò e le tradizioni popolari albanesi" në
një konferencë për Zef Schiro-in; boton studimin "Scanderbeg nelle tradizioni popolari
albanesi" (1969) dhe përgatit shqip-italisht me një hyrje, botimin e veprës së At
Gjergj Fishtës "Jerina ose Mbretnesha e Luleve". Qe bashkëpunëtor i revistës "Shêjzat"
të Ernest Koliqit. Me nisjen rishtas të "Hyllit të Dritës" më 1993, ishte një ndër
bashkëpunëtorët e saj. La arkivë të pasur dorëshkrimesh historike të nxjerra nga Propaganda
Fide, të shekujve XVI-XVII, studime gjuhësore e letrare të cilat gjenden në Bibliotekën
Françeskane "At Gjergj Fishta" në Shkodër. Gjatë kësaj kohe është marrë edhe me studimin
e arbëreshëve të Italisë, disa për të cilin ndodhen të transkriptuara në Arkivin Françeskan
në Shkodër. At Jak Marlekaj ndërroi jetë në Kuvendin e Shën Andout në Bari, Itali,
më 27 korrik 2003.