Benedikti XVI u kërkon të rinjve guximin të kuptojnë se liri nuk do të thotë t'i japësh
vlerë çdo gjëje pa dallim. Liria është Krishti.
(20.04.2008 RV)Orkestra e të rinjve
të organizatës kishtare “Bashkim e Çlirim” e priti Benediktin XVI në fushën e sportit,
ku ndodheshin rreth 20 mijë të rinj, sëbashku me rreth 300 seminaritë, ardhur nga
dioqeza e Bregut Lindor. Vetë Seminari i Shën Jozefit në Nju Jork është themeluar
në vitin 1986 dhe menjëherë pati pranuar 96 seminaristë. Tani, ata janë 160 dhe për
studimet e tyre, mund të shfrytëzojnë një bibliotekë me 81 mijë vëllime. Pas përshëndetjes
së kryeipeshkvit të Nju Jorkut, tre përfaqësues të të rinjve i ofruan Papës bukë,
oriz e misër, si simbol i pasurisë së traditave të tyre të ndryshme. E më pas një
“Happy birthday” (Hepi Bërthdej) – kënga e urimeve për ditëlindjen në gjermanisht. Katër
çifte të rinjsh i dhuruan Papës një tekst, që përdoret në shkollat katolike për historinë
e katolicizmit në shtetin e Nju Jorkut. Më pas u projektuan fotografitë e 6 personave,
që kanë lindur ose jetuar në Shtetin e Nju Jorkut, të deklaruara më pas Shenjtorë,
të Lumë ose Shërbëtorë të Zotit. Pikërisht nga jeta e tyre e shkëlqyer u nis Ati i
Shenjtë për të nënvizuar se shembulli i tyre është mënyra me të cilën secili prej
nesh mund t’i japë përgjigje kujtdo që na kërkon arësyet e shpresës së krishterë,
që banon në ne. E nuk ka një model për këtë, pasi edhe shenjtërit e paraqitur kanë
orgjinë familjare e jetë të ndryshme, nga të varfërit tek të pasurit, nga laikë tek
rregulltarë, njëra e martuar, tjetri emigrant, bija e një luftëtari Mohouk, një skllav
haitian e një intelektual kuban. Por elementi i përbashkët për të gjithë, nënvizoi
Ati i Shenjtë, është se të ndezur nga dashuria për Krishtin, jeta e tyre u bë rrugë
e jashtëzakonshme shprese. Po sot, kush e dëshmon Lajmin e Mirë të Jezu Krishtit
në rrugët e Nju Jorkut, në periferitë e mënjanuara të qytetit, në vendet ku mblidhen
të rinjtë për të kërkuar një pikë referimi? Që këtej del detyra për të rinjtë e mbledhur
para Atit të Shenjtë. Papa përmendi vështirësitë e kaluara në rininë e vet, tmerrin
e Luftës II Botërore, emigrimin e shumë të rinjve në Amerikë dhe arritjen e lirisë
në sajë të ardhjes së demokracisë. E paralajmëroi: “… Fuqia shkatërruese gjithsesi
mbetet… Por ajo nuk do të triumfojë kurrë; është mundur. Është ky thelbi i shpresës,
që na dallon si të krishterë”. Jemi të lirë në botën e sotme demokratike,
por si e përdorim këtë liri e sa na ndihmon demokracia për të kapërcyer vështirësitë
e jetës? Cilat janë pikat e referimit, që duhet të mbeten të patundura në shoqëri?
Benedikti XVI vuri në dukje sa herë personat, të cilëve jeta nuk u jep shumë mundësi,
në vend të dorës së shtrirë të shpresës gjejnë para vetes grushtin e shtypjes e përpjekjen
e manipulimit. E nuk janë situata të lehta. Është fjala për të droguarit, për njerëzit
pa shtëpi, për të varfërit, viktimat e racizmit, të dhunës e të degradimit, sidomos
për gratë e vajzat: “Ndërsa shkaqet e situatave të tilla problematike janë
të ndërlikuara, të gjitha kanë të përbashkët qëndrimin mendor të helmatisur, që shfaqet
në trajtimin e personave si të ishin thjesht sende – afirmohet kështu një pandjeshmëri
zemre, që më parë injoron e pastaj vë në lojë dinjitetin që Zoti i jep çdo njeriu…” Pas
këtij denoncimi, Ati i Shenjtë i ftoi të rinjtë ta bëjnë sëbashku me këta njerëz rrugën
e mirësisë e të shpresës. Më pas, Papa u ndal në temën e lirisë së individit dhe
përdorimit të saj. Liria – theksoi Benedikti XVI – është një vlerë delikate. Mund
të keqkuptohet ose të përdoret keq e në vend që të çojë drejt lumturisë që të gjithë
presin prej saj, çon drejt skenarit të errët të manipulimit, që i hap rrugën atyre
që kanë një plan të fshehtë për të na çoroditur mendjen e për të krijuar konfuzion.
A e keni vënë re – pyeti Papa - sa shpesh rivendikimi i lirisë bëhet pa iu referuar
asnjëherë së vërtetës mbi njeriun? “Sot, ka nga ata që pohojnë se respektimi
i lirive të individit e bën të padrejtë kërkimin e së vërtetës, duke përfshirë edhe
të vërtetën mbi të mirën e kuptimin e saj. Në disa ambiente, përmendja e së vërtetës
konsiderohet burim diskutimesh ose ndarjesh e prandaj, kjo duhet rezervuar vetëm për
sferën private. E në vend të së vërtetës – apo më mirë, të mungesës së saj – është
përhapur ideja se, duke i dhënë vlerë gjithçkaje pa dallim, sigurohet liria e çlirohet
ndërgjegjia. Kjo quhet relativizëm”. Por cili është qëllimi i kësaj lirie që,
duke injoruar të vërtetën, ndjek çka është e gënjeshtërt dhe e padrejtë? Sa të rinjve
u është dhënë një ndihmë, e cila, në emër të lirisë apo të përvojës, i ka udhëhequr
drejt drogës, konfuzionit moral ose intelektual, drejt dhunës, humbjes së respektit
për vetveten e madje drejt dëshpërimit e kështu, tragjikisht, drejt vetëvrasjes? “E
vërteta nuk është imponim. E as thjesht një grumbull rregullash. Është zbulimi i të
Vetmit që nuk na tradhëton kurrë; i të Vetmit që mund t’i besojmë gjithnjë. Duke kërkuar
të vërtetën arrijmë të jetojmë sipas fesë, sepse, në fund të fundit, e vërteta është
një person: Jezu Krishti". E sërish, Papa përsëriti atë që u tha edukatorëve
katolikë në Uashington dhe që e ka specifikuar edhe në Enciklikën “Spe Salvi”. Liria
e vërtetë nuk do të thotë të çlirohesh nga impenjimet, por të impenjohesh për të tjerët,
ashtu si Krishti, shembull e model i jetës së krishterë. E këtu Ati i Shenjtë hyri
në poezinë e simboleve të Pashkëve, për t’u shpjeguar të rinjve se si mund të ndihmojnë
të tjerët të ecin në rrugën e lirisë, që çon në kënaqësi e lumturi të qëndrueshme.
Papa kujtoi domethënien e simbolit të dritës. “Drita e Krishtit na fton të jemi yje-udhëheqës
për të tjerët, duke ecur në udhën e Krishtit që është falje, pajtim, përvujtëri, gezim
e paqe”. Por nganjëherë, vërejti Papa Racinger, mbyllemi në vetvete, dyshojmë në forcën
e shkëlqimin e Krishtit, e kufizojmë horizontin e shpresës. Prej këndej thirrja: “Guxim!
Larmia e përvojës së shenjtorëve për praninë e Zotit na sugjeron të zbulojmë sërish
gjerësinë dhe thellësinë e krishterimit… Nganjëherë konsiderohemi si njerëz që flasin
vetëm për moslejime. Asgjë s’mund te jetë më larg së vërtetës! Një dishepull i vërtetë
i krishterë karakterizohet nga ndjenja e mrekullisë. Jemi para atij Zoti që e njohim
dhe e duam si mik, para madhështisë së krijimit e bukurisë së fesë sonë të krishterë”. Guxim
pra, feja e krishterë është publike, për të gjithë, por Papa nuk harron edhe sferën
private. Gjëja më e rëndësishme, u tha të rinjve, është të krijoni marrëdhënie personale
me Zotin e kjo bëhet përmes lutjes. E sërish fjalët e Atit të Shenjtë kthehen në poezi:
“Shihni përreth me sytë e Krishtit, dëgjoni me veshët e tij, mendoni e përdoreni intuitën
me zemrën dhe shpirtin e tij. Të jeni të gatshëm për të dhënë gjithçka për të vërtetën
dhe drejtësinë, siç bëri Ai…” Në përfundim të fjalës së tij, Benedikti XVI iu drejtua
në mënyrë të veçantë seminaristëve. Duke i përgëzuar për shtimin e numrit, nënvizoi
se si thirrjet meshtarake lindin në gjirin e familjes e i këshilloi kandidatët të
hedhin poshtë çdo prirje drejt karrierizmit e mendjemadhësisë. U tha rregulltarëve
të mbeten besnikë ndaj karizmës themeluese e jo ndaj personave të caktuar dhe përfundoi
me fjalët: “Çfarë po kërkoni? Çfarë ju sugjeron Zoti? Shpresa që nuk të zhgënjen kurrë
është Jezu Krishti”.