Papa në SHBA: në takim me krerët e feve, dialog ndërfetar, por të qartë për dallimet
që ekzistojnë ndërmjet feve.
(18.04.2008 RV)Aktiviteti i fundit
i ditës së djeshme të udhëtimit të tetë apostolik të Papës Benedikti XVI në SHBA (natë
në Evropë), ishte takimi me përfaqësuesit e feve të tjera në Qendrën Kulturore “Papa
Gjon Pali II” të Uashingtonit. Kjo qendër është hapur në vitin 1998, me iniciativën
e kryeipeshkvit të atëhershëm të kryeqytetit. Është një qendër që ka për qëllim promovimin
e dialogut mbi marrëdhëniet ndërmjet fesë dhe kulturës e pra, edhe një pikë takimi
ndërmjet feve të ndryshme. Pritën Atin e Shenjtë rreth 200 përfaqësues të 5 bashkësive
fetare: hebrenjtë, myslimanët, hinduistët, budistët dhe xhianistët. Në fjalimin
e tij, Papa vuri në dukje traditën amerikane të dialogut dhe të bashkëpunimit me fetë
e tjera, lutjet e përbashkëta për festa dhe nisma të ndryshme bamirësie, si edhe bashkëpunimin
në rastet e çështjeve të rëndësishme të politikës amerikane, që kanë të bëjnë me vlera
të përbashkëta etike. Takimi ndërmjet feve favorizohet edhe nga përbërja e ndryshme
e shoqërisë amerikane. Të krishterë, hebrenj, myslimanë, hinduistë e fëmijë të të
gjitha feve ulen sëbashku në bankat e shkollave e mësojnë nga njëri-tjetri, nënvizoi
Papa: “Kjo ndryshueshmëri paraqet sfida të reja, që ngjallin një reflektim
më të thellë mbi parimet themelore të një shoqërie demokratike. Marrshin guxim nga
përvoja juaj edhe të tjerët, që duhet të kuptojnë se një shoqëri e bashkuar mund të
dalë edhe nga pluralizmi i popujve – “E pluribus unum” – nga shumë, një” -, me kusht
që të gjithë ta njohin lirinë fetare si një të drejtë civile themelore”. Detyra
për ta mbrojtur këtë liri është gjithnjë aktuale e kjo duhet bërë jo thjesht me ligje,
theksoi Ati i Shenjtë. Garantimi i të drejtave me ligj nuk do të thotë që popujt në
minoracë të mos pësojnë forma të tjera diskriminimi e padrejtësie. Që këtej, Papa
i bën thirrje gjithë shoqërisë, duke filluar nga vetë anëtarët e Kishës: “Ftoj
të gjithë personat e fesë ta konsiderojnë dialogun jo vetëm si mjet për të përforcuar
mirëkuptimin e anasjelltë, por edhe si mënyrë për t’i shërbyer më mirë shoqërisë…
Një shembull konkret i kontributit që bashkësitë fetare mund t’i ofrojnë shoqërisë
civile janë shkollat konfensionale. Këto institucione i pasurojnë fëmijët si nga pikëpamja
intelektuale, ashtu edhe nga ajo shpirtërore. Të udhëhequr nga mësuesit e tyre që
të zbulojnë dinjitetin që Zoti i ka dhuruar çdo qënieje njerëzore, të rinjtë mësojnë
të respektojnë besimin dhe praktikën fetare të të tjerëve, duke kontribuar në jetën
civile të një kombi”. Papa nënvizoi përgjegjësinë e krerëve të feve në këtë
drejtim. Ata duhet ta ngjizin shoqërinë me përvujtëri e respekt për jetën e lirinë
njerëzore, të bëhen garant për respektimin e dinjitetit të njeriut, të lehtësojnë
arritjen e paqes e të drejtësisë, t’u mësojnë fëmijëve atë që është e drejtë dhe e
arësyeshme. Edhe qeveritë botërore kanë tashmë interes të sponsorizojnë dialogun
ndërfetar, nënvizoi Papa, pasi kjo është rruga për të siguruar një paqe të qëndrueshme,
por: “Objektivi më i madh i dialogut është zbulimi i së vërtetës. Cila është
origjina dhe ku shkon njerëzimi? Ç’janë e mira dhe e keqja? Çfarë na pret në fund
të ekzistencës sonë tokësore? Vetëm duke përballuar këto çështje më të thella mund
të ndërtojmë një bazë solide për paqen e sigurinë e familjes njerëzore”. Më
pas, Ati i Shenjtë vuri në dukje se katolicizmi ka pika të përbashkëta me fetë e tjera,
por ka edhe ndryshime. E kemi për detyrë, tha Papa Racinger, të diskutojmë për këto
ndryshime me qetësi e qartësi, pasi vetëm e vërteta sjell paqen e bashkëjetesën: “…
objektivi më i rëndësishëm i dialogut ndërfetar kërkon një ekspozim të qartë të doktrinave
respektive fetare. Për këtë qëllim, kolegjet, universitetet e qendrat e studimit janë
vende të rëndësishme për shkëmbimin e sinqertë të ideve fetare. Nga ana e saj, Selia
e Shenjtë mundohet ta kryejë këtë punë të rëndësishme përmes Këshillit Papnor për
Dialogun Ndërfetar, Institutit Papnor të Studimeve Arabe dhe Islamistikës dhe Universiteteve
të ndryshme Papnore”. Në përfundim të fjalimit të Papës Benedikti XVI, 15
eksponentë të feve të tjera takuan Atin e Shenjtë. Më pas, Papa bëri një vizitë të
shkurtër në Kapelën e Qendrës Kulturore dhe në një dhomë të veçantë u takua me përfaqësuesit
e bashkësisë hebraike, të cilëve u uroi Pashkët, që fillojnë të shtunën, më 19 prill.